Модернизација на здравствениот систем беше еден од најбитните столбови во проектот суштински промени во здравството, истакна досегашниот министер за здравство Бујар Османи, на прошталната прес конференција на која пред новинарите го презентираше сработеното во својот мандат

Според досегашниот министер за здравство Бујар Османи, него, вредноста на сите инвестиции во здравството, почнувајќи од набавка на најсовремена медицинска опрема и реконструкција на јавни здравствени установи, изнесува околу 150 милиони евра. „Реализацијата на проектот за набавка на нова современа медицинска опрема претставува најголема инвестиција во здравството во последните 20 години. Се потрудивме апаратурата да биде последното нешто на медицинскиот пазар . Донесени се 12 компјутер-томографи, шест магнетни резонанци, два ангиографа, многу гинеколошки, радиолошки апарати, а успешно е завршен и проектот за набавка на нова офталмолошка опрема.Од пред две години започна првата од трите фази на проектот за реконструкција и доградба на болниците, инвестиција вредна 100 милиони евра и најголема до сега во здравствената инфраструктура“, рече Османи.Тој додаде дека се преземени и други активности во однос на превентивната здравствена заштита. „Во секундарната здравствена заштита битна е трансформацијата на Воена болница во нова Градска болница. Во нормативно-правниот дел, направени се измени на неколку важни закони.Развиена е дејноста за итна медицинска помош во здравствените домови и во завршна фаза е набавката на нови 80 амбулантни возила. Паралелно со активностите се изврши и едукација на медицинскиот персонал за употреба на новата апаратура и нејзино одржување. Во тек е проектот за издавање електронски здравствени картички. Од 1 јануари 2012 година започнува проектот за движење на пациентите низ системот“, нагласи Османи, според кого промените не се најбитната карактеристика на овој мандат, туку оптимизмот дека може поинаку и може подобро. Неговиот мандат го оценува за успешен, а реформа која не успеа да ја заврши е реформата за здравственото осигурување, односно пакетите на здравствени услуги. За најголем проблем во здравството го смета непостоењето на конзистентност на политиките во оваа област и систематски решенија во последните 20 години. Османи по завршувањето на министерската функција посакува да се врати меѓу лекарите, но околностите ќе му диктираат што понатаму. За изборот на новиот министер за здравство вели:„Изборот на лекар не е клучен аргумент за да се биде добар министер за здравство. Во последните 20 години имавме лекари за министри за здравство, па не секој успеал да се соочи со предизвиците што ги наметнува овој сектор. Добар министер, пред сè треба да биде добар менаџер кој ќе ги спроведе политиките на Владата во делот на подобрување на здравствениот систем.“