„Дневник“ -Под наслов „Малолетнички ги оставаат бебињата во родилиште“, информира дека за пет месеци во болниците има 24 напуштени бебиња.

„Дневник“

Под наслов „Малолетнички ги оставаат бебињата во родилиште“, информира дека за пет месеци во болниците има 24 напуштени бебиња. Според статистиката, најголем процент мајки кои ги оставиле своите бебиња се млади и немажени девојки, но има и случаи кога жените се силувани. Социјалните работници велат дека жените кои решиле да ги остават своите бебиња не треба да се сметаат за монструми затоа што некои од нив се силувани, други, пак, неуки доцна ја забележале бременоста. Според законот, мајките имаат три месеци време да размислат што со нивното дете, но ако не се појават во тој рок, автоматски им се одзема старателството.„Нова Македонија“

„Хрватска во ЕУ: Мост или рампа“, е централна тема во весникот во која се истражува дали е можно Хрватска за Србија да биде тоа што Грција е за Македонија? Многумина во Загреб мислат дека не може толку лесно да се предвиди однесувањето на земјата и дека таа ќе мора да игра според правилата на мнозинството на Унијата. Процените се дека проширувањето извесен период ќе стагнира. Случувањата внатре во ЕУ укажуваат на тоа дека проширувањето воопшто не е приоритет на Брисел. „Утрински весник“

Под наслов „Политички земјотрес од осум Рихтери“, пренесува детали од уривањето на дел од објектот „Космос“ во сопственост на Фијат Цаноски. Стручњаците велат дека оштетувањата направени со минирање на објектот се еднакви на оштетувања што би ги направил земјотрес посилен од девет степени според Европската макросеизмичка скала. Опозицијата најостро го осуди минирањето и најавува граѓански отпор. Опозициониот фронт бара власта да престане да се пресметува со политичките неистомисленици.