Вкупно 13 автори доставиле предлози за свечена композиција што треба да биде изведена на централната прослава по повод Денот на независноста, Осми септември и ќе ја одбележи 20-годишнината од самостојноста на Македонија, информираат од Министерството за култура за „Макфакс“.

Вкупно 13 автори доставиле предлози за свечена композиција што треба да биде изведена на централната прослава по повод Денот на независноста, Осми септември и ќе ја одбележи 20-годишнината од самостојноста на Македонија, информираат од Министерството за култура за „Макфакс“.

Според конкурсот, кој финишираше во понеделникот, композицијата треба да има свечена нота со македонска мелоритмика, а текстот да биде во духот на јубилејот. Според најавите, денеска или утре ќе бидат соопштени резултатите од конкурсот.

Министерството за култура е носител на целокупната прослава на 20-годишнината од независноста. Септември е прогласен за месец на независноста, а најголем дел од манифестациите се закажани за 8 Септември.

„Предвидена е широка палета на активности со кои достоинствено ќе биде одбележан јубилејот“, велат од Министерството за култура.

За Денот на независноста е предвидено свечено отворање на споменикот „Воин на коњ“ на Плоштадот „Македонија“ во Скопје. Коњаникот, војниците-чувари, лавовите и рељефите веќе се поставени, а во моментов се работи на фонтаната. Од Општина Центар објаснуваат дека работите за комплетирање на целиот објект се одвиваат според предвиденото.

„Ништо не доцни. Во моментов интензивно се работи на фонтаната и нејзините елементи и очекуваме целокупниот споменик да биде готов до Денот на независноста, 8-ми септември“, вели Јовица Ацковски, портпарол на општината Центар, која е надлежна за изградбата на споменикот.

Истиот ден, спроти „Воинот на коњ“ преку реката Вардар ќе биде отворена зградата на Музејот на македонската борба за државност и самостојност. Според најавите, меѓу другото, во музејот ќе бидат поставени восочни фигури на значајни личности од македонската историја, портрети и масовни историски сцени.

За 8 Септември е најавено и отворањето на „Порта Македонија“, лоцирана на источната страна на скопскиот плоштад. Во моментов се работи на рељефите со мотиви од македонската историја, кои се поставуваат на фасадата на објектот. Предвидено е портата да служи и како видиковец.

Во рамки на одбележување на јубилејот, од Министерството за култура најавуваат промоција на 130 тома македонска книжевност на англиски јазик.

Во чест на празникот, пред македонските стопанственици е предложено јубилејот да биде одбележат преку ставање на етикети на своите производи, амбалажи, етикети, специјално изработено по повод јубилејот.

За празникот е закажано и свеченото отворање на новиот терминал на скопскиот аеродром „Александар Велики“. Модернизацијата, инвестиција на турската компанија „Тав“, чини околу 110 милиони евра.

Најголемиот дел од објектите, чие отворање е предвидено за Денот на независноста, се дел од проектот „Скопје 2014“. /крај/ач