Илјадници граѓани дојдоа на прославата за 20-годишнината од независноста на Македонија во центарот на Скопје.

Илјадници граѓани  дојдоа на прославата за 20-годишнината од независноста на Македонија во центарот на Скопје. Небото го надлетуваат авиони со македонско знаме.

Прославата започна предмалку со обраќање на првиот парламентарец, Трајко Вељаноски пред Собранието на Македонија.

Се очекува Вељановски да ја изнесе оригиналната декларација за независност од 1991 година. Документот ќе биде преземен од страна на Гардата на АРМ и ќе биде пренесена до Музејот на македонската борба.

Прва станица на свеченото дефиле ќе биде Портата „Македонија“, низ која прво ќе поминат 1.000 деца, како симбол за иднината на Македонија. Децата, заедно со Калиопи Букле ќе изведат роденденска песна на композиторот Марјан Неќак.

Предвидено е дефилето да се упати кон плоштадот „Македонија“, каде до спомениците на Методија Андонов – Ченто, Цар Самоил, Гоце Делчев, Даме Груев, Гемиџиите и Јустинијан Први ќе стојат актери во костими од времето на кое припаѓаат историските личности.Потоа гардата ќе ја пренесе Декларацијата до новиот музеј, каде ќе му биде предадена на Претседателот Ѓорге Иванов. Во чест на поставувањето на декларацијата во Музејот, АРМ на скопското Кале ќе испука топовски плотуни.

Предвидено е, по повод отворањето на музејот, да се одржи театарски ораториум „Непокор“, илустриран со познати сцени од македонската историја. Пред музејот, припадници на АРМ ќе изведат почесна стрелба во чест на сите загинати херои за Македонија.

Централниот дел од прославата ќе се одржи на плоштадот „Македонија“, каде ќе биде поставена 40 метри долга бина. Предвидено е обраќање на Премиерот Никола Груевски, по што ќе следува грандиозното пуштање во употреба на фонтаната со споменикот „Воин на коњ“. Ќе биде премиерно изведена и свечената композиција „Македонија“ од страна на дваесетина естрадни ѕвезди. Прославата ќе финишира со настап на околу 90 изведувачи на забавна и народна музика.

Поради одржувањето на централната прослава, од 16 часот, па се до доцните вечерни часови во центарот на Скопје е воспоставен посебен сообраќаен режим.

Затворени сообраќајници за движење се улица „11 Октомври“ од крстосницата кај Монополот, преку улицата „Димитрија Чуповски“ (поранешна „Вељко Влаховиќ“) до крстосницата на оваа улица со булеварот „Климент Охридски“. Потоа, ќе биде затворена улицата „Васил Главинов“ од објектот Тифани до објектот Палома Бјанка, како и улицата „Даме Груев“ по целиот нејзин потег. Затворени ќе бидат и сообраќајниците „Васил Аџиларов“ (поранешна „Моша Пијаде“) од хотелот „Холидеј Ин“ до Собранието на Република Македонија, како и делот на булеварот „Кочо Рацин“ од крстосницата Комплекс банки до крстосницата со улиците „Мито Хаџивасилев Јасмин“ и „Бихаќка“. Исто така, од десната страна на реката Вардар затворени ќе бидат улиците „11 Март“ од Вијадуктот до Камениот мост, како и улицата “Црвена скопска општина“ (кај црквата Св. Димитрија)./крај/фф/ач