Македонија
Меѓународен ден на слепите и на слабовидните лица
Меѓународниот ден на слепите и на слабовидните лица, попознат како Ден на белиот стап се одбележува денеска во целиот свет во согласност со препораката на ОН и Резолуцијата на Светскиот сојуз на слепите од 1992 година.
Меѓународниот ден на слепите и на слабовидните лица, попознат како Ден на белиот стап се одбележува денеска во целиот свет во согласност со препораката на ОН и Резолуцијата на Светскиот сојуз на слепите од 1992 година.Белиот стап е основно, досега ненадминато средство за самостојно движење на слепите лица. Иако белиот стап има соодветни недостатоци при движењето, другите помагала и средства за движење на слепите можат да бидат само дополнителни во однос на стапот. Насекаде во светот, 15 октомври се одбележува како Ден на белиот стап, како Ден на слепите за да се подигне свеста за проблемите на слепите и на слабовидните лица. Слепите овој ден го одбележуваат како можност да извршат ретроспектива на она што е сторено и да ја констатираат постојната состојба, планирајќи ги наредните чекори и мерки за подобрување на положбата на слепите. Меѓународниот ден на белиот стап со својата симболика и со недвосмислените пораки претставува многу повеќе – потсетува на проблемите на слепите и укажува на нивната загрозеност, која е своевиден апел и барање јавноста да се запознае, а општеството да се обврзе, дека треба слепите да ги прифати како рамноправни членови на заедницата, со сите граѓански права и човекови слободи, ослободување од секаква дискриминација и маргинализација. Националниот сојуз на слепите на Република Македонија со традиција долга 65 години со своите 17 здруженија на слепите лица како автентични и легитимни претставници на слепите бараат од македонската држава и општество на слепите да им овозможат и да создадат услови за целосна општествена интеграција и продуктивен живот и работа. Слепите не сакаат да бидат маргинализирани и отстранети од општествената сцена, туку да се интегрираат и да бидат присутни не само со својата активност, туку и со конкретен придонес за решавање на својата, но и на пошироката општествена проблематика, се вели во соопштението. /крај/со/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Јанчев од Левица по сообраќајната несреќа: Веднаш пружив помош, но бев мета на политичка хајка
Пратеникот и лидер на Левица, Саше Јанчев, денеска се огласи по повод сообраќајната несреќа во која бил учесник, истакнувајќи дека во настанот се погодени најмалку три семејства и бројни блиски лица, поради што досега, како што вели, свесно молчел. Јанчев нагласува дека не сака да навлегува во детали од несреќата, но чувствувал потреба јавно да се произнесе поради, како што тврди, политичката злоупотреба на случајот.
Тој изрази жалење за сè што се случило таа вечер и посочи дека веднаш по несреќата пружил помош и повикал итни служби. Притоа, Јанчев укажа дека брзата помош, според неговите наводи, пристигнала по цели 50 минути.
Во изјавата потенцира дека бил единствениот легален учесник во сообраќајот во конкретната несреќа и отфрли тврдења дека управувал возило под дејство на алкохол или дрога, како и дека возел со непрописна брзина, оценувајќи ги ваквите информации како целосно неточни.
Јанчев реагира и на објавите во дел од медиумите дека управувал „бесен џип“, наведувајќи дека неговото возило е старо 20 години и дека станува збор за намерно креиран наратив. Според него, уште истиот ден по несреќата, владејачките партии започнале, како што рече, координирани политички напади против него.
Тој обвини дека бил јавно осуден преку партиски прес-конференции и медиумски настапи, без, како што посочи, да се постави прашањето за одговорноста на министерот за внатрешни работи и министерот за здравство. Јанчев наведе и дека од страна на власта му биле упатени закани поврзани со работата на Анкетната комисија за Кочани.
Во однос на прашањето за пратеничкиот имунитет, Јанчев истакна дека никогаш не се повикал на него и дека имунитетот, како што нагласи, не ја исклучува кривичната одговорност.
„Сето ова се прави без чувство дека во приказната не сум само јас, туку и луѓе кои се настрадани и длабоко потресени“, наведе Јанчев, повторувајќи дека искрено жали за сè што се случило и дека не знае зошто морало да дојде до таков трагичен настан.
Македонија
ТАВ Македонија: Меѓународниот Аеродром Скопје е отворен
Поради густата магла која ја зафати скопската котлина, а која предизвика намалена видливост, на Меѓународниот Аеродром Скопје, денеска од 00:00 часот до 18 часот, има 16 откажани и 11 пренасочени летови. Три авиони слетаа и три авиони полетаа после пладне, кога се подобрија временските услови. Слетаа авионите од Дортмунд, Истанбул и Париз, а полетаа за Истанбул, Осло и Баден-Баден, информираат од ТАВ Македонија.
Бидејќи временските услови се менуваат постојано, од ТАВ Македонија апелираат до сите патници да ги следат информациите и насоките за нивните летови кои ги добиваат од авиокомпанијата со која летаат
-Согласно временската прогноза која ни стигнува од Метео-службата на М-НАВ, намалена видливост се очекува и во текот на ноќта. За патниците и јавноста би сакале да појасниме дека Меѓународниот Аеродром Скопје не е затворен. Аеродромот е постојано отворен, без разлика на временските прилики, а нашиот персонал е подготвен да ги прифати, услужи и испрати и авионите и патниците, се вели во соопштението од ТАВ Македонија.
Сите промени во редовниот распоред на летање се ажурираат во реално време на веб-страницата на Меѓународниот Аеродром Скопје https://skp.airports.com.mk/, а патниците може да се информираат за статусот на нивните летови и на пултот за информации кој работи 24/7 со персонал кој е присутен на аеродромот и на телефонскиот број 02 3148 333.
Македонија
Сонце само над Водно – градот втор најзагаден во Европа
Скопје денеска осамна покриено со густа магла, која целосно го проголта градот и го сокри сонцето од погледот на скопјани. Додека во низините видливоста беше значително намалена, единственото место каде што сонцето се пробиваше низ облаците беше Водно, поточно околу Милениумскиот крст.
Од височините на Водно можеше јасно да се забележи контрастот меѓу сончевото небо и густата магла што се задржа над градот, создавајќи слика на Скопје „заробено“ под сив покрив.
Покрај неповолните временски услови, денес Скопје е рангирано како втор најзагаден град во Европа, што дополнително ја влошува состојбата со квалитетот на воздухот и претставува сериозен ризик за здравјето на граѓаните.
Граѓаните повторно апелираат за итни мерки и долгорочни решенија за справување со аерозагадувањето, кое со години останува еден од најголемите проблеми во главниот град.

