Додека се распаѓа владината коалиција, граѓаните се оставени сами на себе – цените растат, стандардот опаѓа, економската состојба е катастрофална, обвини потпретседателката на СДСМ, Кристина Костова.

„Животот е сѐ поскап, а платите не мрдаат. Маслото за јадење, млекото, лебот, јајцата – основните прехранбени производи – сѐ е поскапено. Пакување од 10 јајца, е веќе 113 денари, маслото за јадење над 90 денари, килограм брашно 49 денари, јогурт 87 денари, покачени се цените на млекото, сирењето. На пазарите исто така има посапувања на овошјето и зеленчукот. Црешите веќе станаа луксуз. Последните податоци за потрошувачката кошничка се поразителни, зголемена е за 836 денари за еден месец. Веќе три минимални плати се потребни за да може да се преживее“, рече таа.

Според неа, една просечно македонско семејство со две деца не можат да ги покријат основните трошоци во месецот, платите не стигнуваат од први до први.

„Како да се покрие храна, струја, вода, школо, лекови? Нема со што да се плати рата за кредит или кирија. Народот се мачи како да истурка месец за месец, додека власта се гоштева со манго, папаја, октоподи. Ова не се статистики, ова е суровата реалност на луѓето во Македонија. На пензионерите кои бројат денови до следната пензија. На младите семејства кои веќе не можат да си дозволат ни основни работи. На самохраните родители кои се борат со скапотијата. На сите оние што се трудат чесно да работат, а не можат да живеат пристојно“, рече Костова.

Таа додаде дека животот во Македонија никогаш не бил поскап, а Владата нема решение за високите цени.

„Премиерот не знаел дека цените биле поскапени, па ќе чекал, да видел какви ќе биле анализите, па ќе реагирале. Ова не е само несериозно, ова е директно признание за промашените владини политики и тотална негрижа за стандардот на луѓето. СДСМ со месеци наназад алармира и предлага конкретни решенија кои власта упорно ги одбива: Укинување ДДВ за храна, зголемување на минималната плата на најмалку 500 евра, зголемување на платите во приватниот сектор и поддршка за домаќинствата со најниски приходи“, рече Костова.

Министерот за култура и туризам, Зоран Љутков, денеска, во рамките на конференцијата на библиотекарите со наслов „Услуги за корисниците со посебни потреби и лица со попреченост“ порача дека библиотеките мора да се приспособат, да бидат пофлексибилни, поотворени и подостапни за сите граѓани, без исклучок.

„На попреченоста не треба да се гледа како на пречка, туку како на предизвик. Таа треба да биде поттик за библиотеките да се приспособат, да бидат пофлексибилни, поотворени и похумани. Затоа, денес, кога технологијата ни нуди сè поголеми можности, немаме изговор да не го направиме тоа. Говориме за пристапност во физичка смисла – како пристап до просториите, но и за пристапност до содржините – преку Брајово писмо, аудиокниги, дигитални формати, приспособени образовни програми и персонализирана поддршка“, рече министерот Љутков.

Според Љутков, сите ние, а особено институциите што ја носат одговорноста за културниот развој, мора да гледаме на достапноста не како на дополнителна обврска туку како на основен принцип. Оваа конференција е важен чекор во таа насока.

„Како Министерство за култура и туризам, свесни сме за предизвиците со кои се соочуваат библиотеките денес затоа ние сме тука да ве поддржиме не само со зборови туку и со дела. Да креираме заедно културни институции во кои достапноста и грижата не се додаток, туку темел“, порача Љутков.

На петтата конференција на библиотекарите, што се одржува во Велес, во организација на Библиотекарското здружение на РМ, учествуваат библиотекари од земјата и од странство: Србија, Косово, Албанија, Хрватска, Индија и Босна.

Присуството на претседателот на Европскиот совет, господинот Кошта, не е само потврда на нашата длабока дипломатската соработка, туку и реален чин на внимание, поддршка и интерес за иднината на нашата држава и за иднината на Западен Балкан набргу да биде дел од Европската Унија. Во оваа нова етапа, кога граѓаните ѝ ја препуштија одговорноста на новата македонска Влада, моја обврска како премиер е да зборувам отворено, искрено и достоинствено. Тоа го правам првенствено затоа што имам должност кон народот, но и кон самата европска идеја, што толку упорно настојуваме да ја реализираме, истакна премиерот Христијан Мицкоски на заедничката прес-конференција со претседателот на Европскиот совет, Антонио Кошта.

„Нашата посветеност во процесот на евроинтеграциите ќе остане и ќе се засили во периодот што следува затоа што веруваме дека иднината на македонските граѓани е во рамките на европското семејство.

Претседателот Кошта во својот говор пред малку рече дека патот до полноправно членство во рамките на Европската Унија е фрустрирачки, тежок и предизвикувачки, но ние како граѓани, како народ, можеме да кажеме дека со години го одиме најтешкиот пат.

Факт е дека тој пат го одеа и другите народи, кои сега се дел од европското семејство, но граѓаните на оваа, една од најмалубројните земји во срцето на Балканот и во Европа, го одеа и го одат најтешкиот пат, ако може да се каже дека го одат, бидејќи се наоѓаме на истото место каде што бевме и пред 20 години“, рече Мицкоски.

Изрази надеж дека во периодот што следува заеднички ќе го деблокираат тој процес, достоинствено, како што рече, бидејќи една од суштинските европски вредности е токму достоинството.

„И достоинствено ќе бидеме дел од европското семејство. Јас сум убеден дека имаме вредности, имаме капацитет, имаме знаење и знаеме како да го изодиме тој пат на најбрз начин, а со помошта што лично ја дава претседателот Кошта и поддршката и помошта што ги имаме и од Европската комисија и од земјите членки сигурен сум дека ќе направиме квалитетни реформи и реформи што ќе обезбедат европска иднина за нашата држава и за нашите граѓани“, додаде премиерот.