Премиерот Никола Груевски и шефот на дипломатијата, Никола Попоски побараа Европскиот Совет да ја валоризира третата по ред препорака на Европската Комисија и во декември да одреди датум за старт на пристапните преговори со Македонија.

Премиерот Никола Груевски и шефот на дипломатијата, Никола Попоски побараа Европскиот Совет да ја валоризира третата по ред препорака на Европската Комисија и во декември да одреди датум за старт на пристапните преговори со Македонија.

На отворањето на денешниот состанок „Европските предизвици на земјите од Западен Балкан“ во Скопје, на кој учествуваат министрите за евроинтеграции од западниот Балкан, премиерот Груевски, говорејќи за реформскиот процес во земјата, побара од Европската Унија билатералните прашања да не бидат пречка за европската иднина на регионот.

„И покрај сета апсурдност на спорот со името, Македонија е активна и конструктивна во разговорите со Грција за надминување на разликите околу името, кои се водат под покровителство на Обединетите Нации. Она што е потребно е и грчката страна активно и конструктивно да придонесе во разговорите со цел без натамошно одлагање да се изнајде заедничко прифатливо решение кое нема да наштети на јазичната и културната самоидентификација ниту на македонскиот, ниту на грчкиот народ. Сметам дека напредокот на земјите аспиранти во исполнувањето на Копенхашките критериуми треба да остане единствен критериум за напредок кон членството во Европската Унија. Билатералните прашање не треба да го држат во заложништво пристапниот процес на Балканот, затоа што тој е круциален фактор за земјите од регионот“, рече Груевски.

„Европската Комисија останува наш кредибилен партнер, би рекол наш вистински добронамерен ментор во евроинтегративниот процес. Сепак, по обновената препорака, очекуваме земјите членки во Советот на Европската Унија да се раководат од заедничкиот ЕУ-интерес и во декември 2011 година да успеат да постигнат консензус и да ја донесат одлуката за почеток на преговори со Македонија“, рече Попоски.

За преставниците од Унијата, кои ја поздравија повторената препорака за старт на преговорите со Македонија, интеграцијата во Европската Унија е најдобар начин за надминување на проблемите со кои се соочува регионот.

„За нас многу важна вест е фактот што уште еднаш нагласуваме и му препорачуваме на Советот уште еднаш да ги отвори преговорите со Македонија. Мислам дека ова е важен елемент и важна точка и уште еднаш признание за напорите што вие ги правите“, рече Стефано Санино, директор на Генералниот директорат за проширување во Европската Комисија.

„Доколку работиме на пристапувањето на вистински начин, тоа не треба да се гледа како предизвик, туку како придонес во решавањето на проблемите со кои сите земји се соочуваат“, рече европратеникот Ричард Хауит, известувач за Македонија во Европскиот Парламент.

Учеството на конференцијата, на која е и косовската министерка Влора Читаку, во последен момент го откажа српскиот вицепремиер Божидар Ѓелиќ.

„Жал ми е што, иако беше прифатена како иницијатива, во последен момент беше откажано присуството на господинот Ѓелиќ. Секако, разбирајќи ги сите околности и комплексноста на Балканот, очекуваме дека во иднина западниот Балкан ќе успее да ги помине своите поделби и ќе гради една заедничка маса, маса на Европа која ќе биде поставена на Балканот“, рече вицепремиерот за европски прашања, Теута Арифи.

На денешната конференција, која е во организација на Секретаријатот за Европски Прашања, учествуваат и претставници на Албанија, БиХ, Црна Гора, Хрватска и Турција. /крај/ач