Власта промовира евроскептицизам по објавувањето на извештајот на Европската Комисија за напредокот на Македонија, рекоа пратениците од опозицијата на денешната расправа пред собраниската Комисија за европски прашања.

Власта промовира евроскептицизам по објавувањето на извештајот на Европската Комисија за напредокот на Македонија, рекоа пратениците од опозицијата на денешната расправа пред собраниската Комисија за европски прашања.

Според нив, настапите на премиерот Никола Груевски се најдобар доказ дека евроскептицизмост се повеќе е присутен меѓу владините преставници, нарекувајќи го недозволива авантура.

„Се повеќе и повеќе не напушта добрата волја, позитивната енергија и ентузијазмот кој што ги имавме кон евроинтеграциските процеси и се повеќе се вгнездува евроскептицизмот меѓу владините преставници, а директно преку тоа и меѓу граѓаните на Република Македонија. Сметаме дека во овој период апсолутно недозволива авантура е такви изјави и таков пристап кон суштински прашања како што се европските интеграции на Република Македонија“, рече пратеникот Маринела Тушева од СДСМ.

„Мислам дека е беспредметно да разговараме за било каква тема, било какво поглавје или акционен план кога врвот на владата на Република Македонија, премиерот Никола Груевски со едно интервју покажува на каде ќе ја води Република Македонија во наредните години и какви се неговите замисли за нашата држава во наредните години“, рече Гордан Георгиев од СДСМ.

Од своја страна, власта смета дека проширувањето е непопуларна тема во самата Европска Унија. За пратеникот Антонио Милошоски, угледот на унијата е во заложништво поради противењето на Грција во однос на отворањето на пристапни преговори со Македонија.

„Сметам дека токму заради таквата нелагодност Европската Комисија некогаш е доведена во ситуација да го шири просторот на изговори и забелешки кои што можат да ја амортизираат таа нелагодност, односно да создадат некое порационално објаснување зошто веќе трета година по ред препораката на една сериозна институција, една извршна институција во Европската Унија, како што е Европската Комисија не може да се преточи во политичка одлука за отпочнување на преговорите за членство“, рече Милошоски.

„Европската перспектива е загрозена од неевропското однесување на една земја-членка на Европската Унија“, додаде тој.

Пратеникот Павле Трајанов, пак, побара конкретна стратегија во надворешната политика во однос на интеграцијата во НАТИ и во ЕУ, како и единствена стратегија во однос на надминувањето на спорот со името.

„Мислам дека таква стратегија недостасува 20 години. Нашите дипломати немаат инструкции што треба да прават во овој дел околу нашите евроинтеграциски процеси, околу процесот за добивање покана за влез во НАТО. Ако ги имаат тие се парцијални, дневнополитички, а не како стратегија. Во оваа насока мислам дека треба да има јасна, чиста стратегија за настапите почнувајќи од претседателот на државата, претседателот на владата, министрите за надворешни работи, за одбрана, но исто така треба да имаме јасна стратегија околу дипломатијата на парламентот“, рече Трајанов.

Вицепремиерот за европски прашања, Теута Арифи, пак, рече дека потребен е втор акционен план за задачите поставени од директорот на директоратот за проширување на ЕК, Стефано Санино, чиј рок на исполнување е мај 2012 година, како и годишен план за адресирање на забелешките од извештајот. Посочи дека се потребни тешки одлуки со цел напредок во евроинтеграциите.

„Треба да имаме сили и волја кај нас и во Атина за надминување на спорот со името кој се покажува како еден сериозен политички проблем кој ја држи картата на западен Балкан различна од тоа како што ние сакаме. Треба да го имаме предвид фактот дека од декември картата на западен Балкан во односите со Европската Унија ќе биде видно променета. Токму поради тоа мислам дека како земја треба да се мотивираме да ги носиме и тешките одлуки и големата работа во однос на реализација во однос на тоа што е наша заедничка цел, а тоа е членство во Европската Унија“, рече Арифи пред членовите на Комисијата за европски прашања. /крај/ач