Здружението на новинари на Македонија(ЗНМ) реагира на пресуда на Апелацискиот суд во Скопје со која е осуден и прогласен за виновен новинарот Слободан Чашуле за кривично дело клевета.

Здружението на новинари на Македонија(ЗНМ) реагира на пресуда на Апелацискиот суд во Скопје со која е осуден и прогласен за виновен новинарот Слободан Чашуле за кривично дело клевета.

Станува збор за текст објавен во неделникот „Форум“ додека Чашуле работел како главен уредник, а се однесува за пратеникот Љубисав Иванов-Ѕинго.

Апелацискиот суд на два пати ја укинал пресудата и случајот го враќал на повторно одлучување, но во третиот обид, истиот суд, пресудил на штета на новинарот кој е осуден на казна од 77.000 денари. Сега тој се соочува со барање за отштета во граѓанска постапка.

ЗНМ ги охрабрува судовите во Македонија да го применуваат членот 10 од Европската конвенција за човекови права и судската пракса на судот во Стразбур.

„Недозволиво е ваквите пресуди да ја поткопаат слободата на новинарското изразување посебно во време кога е започнат дијалог со Владата за подобрување на состојбата на медиумите преку барање за декриминализацијата на клеветета и навредата“, се вели во соопштението на ЗНМ.

ЗНМ итно ќе побара средба со Претседателот на Врховниот суд на Македонија на која ќе бара највисокиот суд во државава да им наложи на пониските судови да ги почитуваат одредбите од Европската конвенција за човекови права, но и да се воспостави прифатлива судска пракса за овие случаи. Исто така ЗНМ ќе бара и средба со Судскиот совет во Македонија и со Министерот за правда.

За последните драконски казни ЗНМ ќе ги извести странските амбасадори,ОБСЕ, и другите меѓународни организации. /крај/со/ст