Македонија
Кацин: Македонија нема да добие датум во декември
Македонија нема да добие датум за преговори за членство во Европската Унија во декември, вели во интервју за Радио Слободна Европа, Јелко Кацин, потпретседател на Делегацијата за Југоисточна Европа во Европскиот парламент.
Македонија нема да добие датум за преговори за членство во Европската Унија во декември, вели во интервју за Радио Слободна Европа, Јелко Кацин, потпретседател на Делегацијата за Југоисточна Европа во Европскиот парламент. „Можеби ќе се случи Црна Гора да добие датум, а Србија да добие статус. Но, токму тоа е предуслов на некој начин да се чуе алармот кој би можел да ги разбуди порационалните елементи кај македонската јавност, конечно да се запраша како е можно Црна Гора после една година од статусот да добие датум, како е можно Србија во една таква комплексна ситуација со Косово да добие кандидатски статус, а Македонија во шестата година од добивањето статус сè уште не може да добие датум за почеток на преговори? Мислам дека дојде време да им се отворат очите на луѓето и конечно на луѓето на сегашната гарнитура не само да им постават конкретни прашања, туку и да побараат од нив да направат нешто и за Македонија, а не само за себе“, изјави Кацин.Тој додава дека ниту една држава која тргнала на патот кон Европската Унија и на крајот влегла во Унијата, таа цел не ја постигнала ако претходно не се променила себеси и не направила историски компромиси во односите кон соседите.„Во овие шест години откако Хрватска и Македонија на ист ден добија статус на земја кандидат, Хрватска секој ден сè повеќе напредуваше, додека Македонија сè уште нема добиено датум за почеток на преговорите. Јас не сум еден од оние кои едноставно ги обвинува соседите и измислува непријатели таму каде што ги нема“, додава европарламентарецот.„Во Македонија досега немаше политичка волја за постигнување компромис. Напротив, јас сум убеден дека без потреба се комплицира од македонската страна само за да не се дојде до компромис за името, само за да не се добие датум за почеток на преговори, зашто вака комуницирањето со домашната јавност е многу поедноставно. Тие ни се непријатели, ние сме жртви и тоа го спречува народот да има рационален пристап кон иднината. Затоа Македонија е единствената држава во Западен Балкан која се оддалечува од Европската Унија, а сите останати се приближуваат“, изјави Кацин за Радио Слободна Европа. /крај/рсе/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Граѓаните да овозможат пристап до топлинските потстаници во зградите, порачуваат од ЕСМ
Соработката со потрошувачите е од суштинско значење за навремено и квалитетно снабдување со топлинска енергија, велат од од АД ЕСМ. Во пресрет на новата грејна сезона ги повикуваат граѓаните да ги завршат сите потребни проверки и поправки на внатрешните грејни инсталации пред 15 октомври, потсетувајќи ги дека редовното одржување на внатрешните грејни инсталации е нивна обврска.
Затоа е препорачливо навремено да се извршат проверки и да се завршат започнатите интервенции во најкус можен рок, и тоа да го пријават во Центарот за грижа за потрошувачи. На тој начин придонесуваат испораката на топлинска енергија од системот за централно греење да се одвива непречено и навремено. Исто така, важно е заедниците на сопственици да овозможат пристап на службените лица до топлинските потстаници во објектите и да обезбедат непречено електрично напојување во топлинската станица (платени сметки за електрична енергија за топлинската станица и функционална електрична инсталација) – соопштуваат од компанијата.
Оттаму посочуваат дека за информации или пријави на дефекти и завршени интервенции, потрошувачите може да се јават во Центарот за грижа за потрошувачи.
Македонија
Мицкоски за корупцијата: Имаме партиски октруирано обвинителство и судство, нема да дозволам од тоа да правам естрада, но тие што сториле криминал треба да одговараат
Борбата против корупцијата е можеби една од најголемите забелешки која ја слушаме изминативе денови а критиката се однесува на тоа зошто не апсиме. Нема да дозволам од тоа да правам естрада. Ниту имам намера како човек преку својата позиција и злоупотребите на иснтитуциите кои се дел од македонската влада да манифестирам сила, моќ и реваншизам. Тоа нема да се случи. Човечки е да се простува но исто така потребно е криминалот и корупцијата да бидат казнети. Но има институции каде се водат тие процеси, има закон, има Устав пред кои тие што сториле криминал треба да одговараат, порача премиерот Христијан Мицкоски по повод 100 дена Влада.
Мицкоски побара трпение од граѓаните, оти како што рече процесот е тежок.
„Имаме партиски октруирано обвинителство и судство. Зборувам за една мала група на обвинители и судии кои се партиски послушници кои го контаминираат правосудниот систем. И затоа тргнавме уште на почетокот во делот на реформи во правосудството и дадовме рок дека до крајот на септември чекаме предлози од оние што излегоа со критика. Вчера измина тој рок, ниту еден официјален предлог не стигна до нас. Сите оние што критикуваа дека сакаме да правиме чистка во правосудството и повторна партизација ги нема. Е затоа од денеска започнуваат реформите во правосудниот систем, граѓаните немаат повеќе простор за чекање и сум разочаран што не добивме ниту еден предлог како да се одвива реформата“, порача Мицкоски.
Додаде дека во наредниот период владата започнува со реформи во правосудството.
„Жалам што толкави огромни плати поединци добиваат на грбот на граѓаните а работата што ја испорачуваат е мала или мизерна. Затоа започнуваме со реформите и во периодот кој следи нема запирање во делот на правосудството. Борбата со криминалот и корупцијата продолжува голем дел од случаите се веќе разоткриени и се на виделина на јавноста“, додаде Мицкоски.
Македонија
Минималната плата не стана 450 евра; Трендафилов: Утре ќе биде 101. ден од новата Влада и ништо нема да биде сменето
Владата на Христијан Мицкоски не го исполни барањето на Сојузот на синдикатите на Македонија (ССМ) од мај годинава – покачувањето на минималната плата на 450 евра да им биде приоритет и да се случи во првите сто дена. Претседателот на ССМ, Слободан Трендафилов, сè уште чека седница на Економско-социјалниот совет, на која ќе се разговара за покачувањето на минималната плата.
„Не би коментирал што се случи во првите 100 дена. Утре ќе биде 101. ден од новата Влада и повторно нема да биде ништо сменето. Очекуваме да седнеме на седница на Економско-социјалниот совет и да ни кажат што направиле“, рече претседателот на ССМ, Трендафилов, денес пред почетокот на конференцијата „Социјален дијалог – состојба, перспективи и предизвици“, организирана од ССМ и Фондацијата „Фридрих Еберт“.
Сојузот на синдикатите на Македонија веќе донел одлуки и заклучоци дека ќе им даде поддршка на сите синдикати во борбата за раст на платите, вклучително и на минималната плата, нешто што, според претседателот Трендафилов, требало да се случи вчера оти денес е доцна.
Трендафилов очекувал, но во првите сто дена од новата Влада не бил повикан на состанок за да ги пренесе барањата на работниците, па најави дека тоа ќе го стори на првата седница на Економско-социјалниот совет.
„Сметаме дека аргументите се токму на страната на работниците. Сметаме дека 25.000 работници во државата, кои примаат плата од 22.567 денари, е нечовечки и некоректно да земаат. Сметаме дека 10.000 работници, кои примаат плата од 1 денар до 22.567 денари е кривично дело што го прават работодавците. За да се покрие една синдикална минимална кошничка, потребни се веќе три минимални плати, затоа сметаме дека нашите аргументи се издржани. Делот за храна и пијалаци е веќе 23.000 денари, значи една минимална плата не покрива ниту леб и вода. Овие наши аргументи, како и другите што треба да ги изнесеме на седница на Економско-социјалниот совет, ќе бидат првиот чекор да им покажеме со што се соочуваме како претставници на работниците и сметаме дека ако очекуваат да ги разбереме, треба прво тие да нè разберат нас“, вели претседателот Трендафилов.
Денес, на иницијатива на ССМ, првпат на едно место се собираат претставници на синдикатите, Организацијата на работодавците, претставници од Министерството за економија и труд, како и претставници на Министерството за јавна администрација, да дискутираат за социјалниот дијалог.