Покрај членството во НАТО и ЕУ како стратешки определби во надворешната политика, Македонија има интерес за интензивирање и унапредување на соработката и со земјите од Југоисточна Азија, рекол премиерот Никола Груевски на денешната средба со сингапурскиот премиер Ли Ксиен Лонг.

Покрај членството во НАТО и ЕУ како стратешки определби во надворешната политика, Македонија има интерес за интензивирање и унапредување на соработката и со земјите од Југоисточна Азија, рекол премиерот Никола Груевски на денешната средба со сингапурскиот премиер Ли Ксиен Лонг.

Премиерот Груевски, како што информираат од владата, го поздравил досегашниот развој на пријателските односи меѓу двете држави, а воедно истакнал цврсто уверување дека истите во иднина ќе бележат позитивен развој и зголемена динамика во повеќе области.

Во доменот на економските релации, премиерот Груевски нагласил дека Македонија високо го цени економскиот подем што Сингапур го има остварено во последните децении и дека сингапурското искуство би било значајно за нашата земја да се профилира во атрактивна бизнис дестинација во регионот на Југоисточна Европа.

Во таа насока, македонскиот премиер истакнал дека еден од главните приоритети на Владата на Република Македонија е унапредувањето на економската состојба на земјата и привлекувањето на странски инвестиции, и дека во тој контекст постои голем интерес за унапредување на економските односи со Сингапур и привлекување на сингапурски инвестиции во Македонија.

За таа цел за време на посетата на македонската владина делегација беше организиран и бизнис форум на кој пред сингапурските бизнисмени се презентираше македонската економија, условите за водење бизнис, водечките индустриски сектори и приоритетите на националната економија во глобалните економски текови.

Премиерот Груевски истакна дека постои потреба од зајакнување на правната рамка што ќе биде во функција на унапредување на односите меѓу двете држави и што ќе ја олесни соработката во економијата, и во тој контекст го информираше својот соговорник за македонската иницијатива за склучување Договор за одбегнување на двојното оданочување и заштита од фискална евазија по однос на даноците од доход и добивка, како и Договор за поттикнување и заемна заштита на инвестиции помеѓу двете земји.

Во тој контекст, премиерот Груевски истакна дека македонската страна има интерес за склучување и Спогодба за слободна трговија помеѓу Македонија и Сингапур.

На крајот од средбата Груевски изразил надеж дека реформите кои што ги спроведува Владата во повеќе сфери ќе ги поттикнат и охрабрат сингапурските бизнисмени за зајакната економска соработка и инвестиции во земјата.

Двајцата премиери заклучиле дека оваа посета дава голем оптимизам за текот на идната соработка меѓу двете пријателски земји и дека постои голем простор за унапредување на односите, како на мултилатерален план, така и во доменот на образованието, културата и туризмот, а особено во зајакнувањето на меѓусебните економски релации.

Република Сингапур е островска град-држава во Југоисточна Азија сместена на јужниот врв на Малајскиот полуостров. Таа е парламентарна република од Вестминстерски тип со еднодомен парламент во кој седат претставници избрани во посебните и уникатни изборни единици. Според Уставот на Република Сингапур, политичкиот систем во земјата е дефиниран како претставничка демократија.

Сингапур денес има високо развиена и успешна пазарна економија која претставува крајно отворена бизнис средина без присуство на корупција, со стабилни цени и БДП по глава на жител повисок од тие на највисоко развиените земји. Стопанството на Република Сингапур е главно извозно зависно, особено во делот на потрошувачката електроника (електрични уреди и апарати), информациона технологија, фармацевтски производи, како и во секторот на услуги. Реалниот пораст на БДП за 2010 година изнесуваше неверојатни 14,7%.

Заедно со Хонг Конг, Јужна Кореја и Тајван, Сингапур е еден од оригиналните „Четири азиски тигри“. Економијата на Сингапур се смета за една од најслободните, најиновативните, најконкурентните, најмалку корумпираните и најпогодните за бизнис во светот. Сингапур е 14-от најголем извозник и 15-от најголем увозник во светот и моментално е единствената азиска земја која има добиено ААА рејтинг од сите три најголеми рејтинг агенции – Standard & Poor’s, Moody’s и Fitch.

Поради својата локација, скоро непостоечката корупција, образованата и стручна работна сила, ниските даноци и одличната инфраструктура, Сингапур привлекува многу странски директни инвестиции. Има повеќе од 7000 мулти-национални компании од САД, Европа, Јапонија, а околу 1500 компании од Кина и уште 1500 од Индија имаат свое седиште во Сингапур. Исто така, Сингапур е вториот по големина странски инвеститор во Индија.

Околу 44% од работната сила во Сингапур е составена од странски државјани, а земјата има потпишано повеќе од 10 Договори за слободна трговија со земјите од Регионот.

Сингапур е светски лидер во неколку економски области: земјата е четврт светски финансиски центар, втор најголем казино пазар, најголем светски производител на нафтени платформи, еден од најголемите ремонтери на бродови и еден од најголемите три центри за рафинирање на нафта. Сингапурското пристаниште е едно од петте најактивни во светот. Според Светската Банка, Сингапур е најлесното место за водење бизнис во светот. Стапката на невработеност во 2010 година изнесувала 2%.

Сингапур, исто така, е и голем образовен центар. Во 2006 година во земјата престојувале 80.000 странски студенти, а во 2009 година, 20% од сите студенти на сингапурските универзитети биле странци. /крај/со/ач