Македонија
Притвор за уапсените во полициската акција „Бришач“

Истражен судија им одреди мерка притвор на 25 од уапсените во полициската акција „Бришач“. На шест лица им е одреден притвор од моментот на пронаоѓањето, на 11 лица им е одреден куќен притвор, а на шестмина
Истражен судија им одреди мерка притвор на 25 од уапсените во полициската акција „Бришач“. На шест лица им е одреден притвор од моментот на пронаоѓањето, на 11 лица им е одреден куќен притвор, а на шестмина алтернативни мерки.
Меѓу уапсените има 17 полицајци, раководители на увидна екипа и крим техничари кои правеле лажни извештаи за сообраќајки коишто не се случиле, за да им биде исплатена отштета од осигурителни компании.
Криминалната група ги оштетила осигурителните компании за два милиони денари или за над 30.000 евра. Групата работела од 2007 и случаите на лажирани сообраќајки биле скоро идентични меѓу себе.
Освен материјална, измамниците обезбедувале и нематеријална отштета. Се жалеле на повреди, а имало и случај кога еден од осомничените однел во болница друго лице кое имало претходни повреди за да му биде издадена медицинска документација со која ќе обезбеди нематеријална штета.
Полицијата досега има докази за вкупно 13 сообраќајки коишто ги лажирала оваа група. Притворените ќе одговараат за „Злоупотреба на службена положба и овластување“, „Фалсификување службена исправа“, „Помагање“, „Осигурителна измама“ и „Измама“. /крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Општина Илинден го уредува туристичкиот локалитет „Бучинско езеро“

Општина Илинден информира дека во завршна фаза е урбаното уредување на просторот околу туристичкиот локалитет „Бучинско езеро“ во населеното место Бучинци.
„Станува збор за простор каде граѓаните на општина Илинден ќе можат да уживаат и да го поминуваат слободното време. Се работи на поплочување со нови бекатон плочки, а во тек е изградба на нова платформа и пешачка патека во должина од 60 метри. Исто така, пристап до местото е обезбеден со тампониран пат во должина од 100 метри, а во тек е и изградба на платформа за ловење риба. Поставено е ново улично осветлување и нови канделабри, планирано е поставување на клупи за одмор и корпи за отпадоци. Просторот ќе биде партерно уреден и за дополнително уживање на граѓаните ќе биде изграден нов летниковец“, соопштија од Општината.
Увид во градежните активности изврши градоначалникот на општина Илинден, Александар Георгиевски, кој истакна дека уредувањето на овој туристички локалитет е од особена важност за жителите на општината, како и за сите граѓани што сакаат да го поминат своето слободно време во една мирна и убава, а во исто време модерна средина.
Македонија
Муцунски на средба со министерот за надворешни работи на Казахстан, Мурат Нуртлеу

Во рамки на работната посета на Република Казахстан, министерот за надворешни работи и надворешна трговија, Тимчо Муцунски, оствари средба со заменик-премиерот и министер за надворешни работи на Казахстан, Мурат Нуртлеу.
Во фокусот на разговорите беа можностите за интензивирање на севкупната билатерална соработка, размена на посети на високо ниво, како и одржување на третата рунда политички консултации во Скопје.
Двајцата министри се согласија дека постои значителен потенцијал за понатамошно продлабочување на односите, особено во економската сфера – преку зголемување на трговската размена и поттикнување на странски директни инвестиции. Беше истакнато и задоволството од досегашната соработка на мултилатерален план, при што беа разменети мислења за низа актуелни прашања од регионален и поширок контекст.
Средбата беше заокружена со потпишување на Програмата за соработка меѓу двете министерства за периодот 2025–2027 година, како конкретен чекор кон унапредување на билатералните односи.
Македонија
Во „Пониква“ не можеш ниту на одмор да одиш, а не пак да третираш сериозни медицински состојби: Филипче од Кочани со критики до власта

Претседателот на СДСМ Венко Филипче од Кочани, со критики до актуелната власт за како што рече, неспособноста да се справи со последиците од трагедиите, за немањето одговорност и за бруталниот однос кон граѓаните кои бараат правда и достоинство.
„Бевме внимателни, бевме емпатични кон луѓето. Комунициравме нејавно, со цел да не нѐ обвинат за политизација. Им се наоѓавме, прашувавме што и да треба, и сѐ што можевме, помогнавме“, рече Филипче.
Тој подвлече дека СДСМ покажала што значи одговорно политичко дејствување, без обиди за политичка корист од трагедијата:
„Не сакавме, буквално со ништо, по трагедијата да извлечеме каква било политичка корист.“
Од друга страна, посочи Филипче, власта не само што не испорачала правда, туку целосно потфрлила и во здравствениот систем.
„Што направи власта? Прво, не испорача правда. Понатаму, не испорачува здравствена услуга. Луѓето имаат реален проблем, а тие им го нудат центарот ‘Пониква’ за некаква рехабилитација. Во „Пониква“ не можеш ниту на одмор да одиш, а не пак да третираш толку сериозни медицински состојби,“ истакна Филипче.
Особено срамно, рече тој, е обвинувањето на родителите кои бараат правда.
„Ќе ги обвинуваат родителите дека биле инструмент на некоја политичка партија. Тие луѓе, коишто не спиеле со недели, шокирани од она што им се случи, ги нарекуваат со погрдни зборови, за кои ви гарантирам дека дури и не знам што значат.“
Филипче го осуди и односот на ВМРО-ДПМНЕ кој, како што рече, на денот кога родителите протестираат, организира партиски настан со пиротехника.
„Во таква ситуација, врв на безчувствителност е на денот кога родителите протестираат, да организираш настан на Унијата на млади сили на ВМРО-ДПМНЕ и да запалиш пиротехнички средства.
СДСМ останува на страната на граѓаните на Кочани, на страната на вистината и одговорноста. Ќе продолжиме да се бориме за правдата да излезе на виделина а граѓаните и родителите да добијат соодветен третман“.