Општина Кисела Вода е една од петте општини во државата, во која ќе се спроведе пилот–проектот „Македонија без отпад 2012”.

Општина Кисела Вода е една од петте општини во државата, во која ќе се спроведе пилот–проектот „Македонија без отпад 2012”. Во петокот во просториите на скопската општина Кисела Вода, претставниците од Асоцијацијата за чиста животна средина „Ајде Македонија – Скопје” го презентираа проектот пред комуналните инспектори, општинските службеници од одделението за животна средина, претставници од граѓански здруженија и претставници од месните и урбани заедници.

„Целта на овој проект е да се развијат механизми за поддршка на граѓаните, општините и други засегнати групи подобро да се справат со незаконското фрлање отпад во нивните заедници, со посебен фокус на неопасен комунален отпад што не се собира преку комуналните претпријатија. Истовремено, посебен акцент ќе се стави на подигнување на свеста на граѓаните за современото управување со отпад и потребата да ја преземат одговорноста како загадувачи и активно да се вклучат преку соодветни активности на локално ниво“, нформираше Елизабета Јовановска, извршниот директор на Асоцијацијата „Ајде Македонија“.

Согласно проектот, предвидено е да се развие сеопфатна дигитална база на податоци за локациите, видот и количеството на отпад преку организирано и синхронизирано мапирање, како и зајакнување на капацитетите на локалните заедници во сферата на управувањето со отпадот.

Првата фаза на проектот ќе опфати мапирање на отпадните локации, едукативна и медиумска кампања и реализација на пилот – акцијата на локално ниво во петте општини, која според предвидената динамика во општината Кисела Вода ќе се одржи на крајот на Април, годинава. Втората фаза, која ќе се реализира во Октомври ќе опфати проширување на акцијата на национално ниво.

Акцијата ќе опфати два типа на мобилизирање  и тоа чистење на диви депонии со механизација и професионален приод, како и чистење на рекреативни предели и отворени простори од страна на граѓаните.

Оваа иницијатива е дел од светската кампања „Let’s do it World“ во која учествуваат преку 90 земји во светот, а која има поддршка и од Европскиот парламент./крај/со/мф