Ноќеска во 00.10 часот, полициски службеници од СВР Штип – ОВР Свети Николе, во содејство со инспектори од Дирекција за заштита и спасување, Државен пазарен инспекторат, Управа за јавни приходи, Државен трудов инспекторат и Центар за социјални работи, извршија контрола во угостителски објект во Свети Николе, соопшти МВР.

При контролата, во угостителскиот објект биле затекнати 26 малолетни лица после 24:00 часот, од кои 14 беа под дејство на алкохол.

Според полицијата, по целосно расчистување и документирање на случајот, ќе следуваат соодветни пријави против одговорните лица.

„Воедно, од другите ангажирани инспекциски служби утврдени се низа прекршоци за кои ќе бидат поднесени соодветни поднесоци“.

Во услови кога државата се соочува со највисокиот просечен раст на трошоците на живот во последните години, Владата предводена од коалицијата ВМРО – ДПМНЕ – ЗНАМ – ВРЕДИ продолжува да тврди дека „инфлацијата е под контрола“, истакнуваат од Левицата.

„Меѓутоа, официјалните податоци и реалноста на секојдневниот живот на граѓаните го демонстрираат спротивното. Само во октомври, споредено со истиот месец лани, забележано е зголемување на цените од 5,17%. Кај категоријата храна и безалкохолни пијалоци растот изнесува значајни 7,25% додека кај рекреација и култура достигнува дури 7,85%. Овие индикатори јасно укажуваат на продолжен и интензивен инфлаторен притисок врз семејниoт буџет. Таквата динамика на цените ја потврдува тезата дека инфлаторниот процес не е ниту привремен, ниту доминантно „увезен“ како што претставува Владата. Напротив, станува збор за длабоко структурен проблем кој произлегува од недоволна економска координација, слаба институционална регулација и отсуство на конзистентни антиинфлаторни политики“.

Владата, додаваат од оваа партија, не успеа да изгради ниту една конзистентна политика за заштита на стандардот на граѓаните и наместо системски мерки гледаме импровизации што траат кратко. Истовремено, како што оценуваат, корпоративните профити растат, а реалната плата за мнозинството граѓани заостанува зад инфлацијата што значи дека работниците се секој месец реално посиромашни.

„Ваквата економска политика не е само неспособност тука таа претставува избор. Избор да се стави профитот на крупниот капитал пред потребите на граѓаните. Избор да се прикриваат слабостите на системот со политички пораки наместо со реални реформи. И избор да се дозволи инфлацијата да се претвори во нов данок на сиромаштијата.
Левица уште еднаш предупредува дека без јасна стратегија за сузбивање на инфлацијата, без воспоставување на вистинска контрола над клучните пазари и без политики што ја штитат реалната вредност на платите, државата ќе продолжи да тоне во спирала на поскапувања и раст на нееднаквоста“.

Според нив, приоритетот треба да биде: економија во служба на граѓаните, а не граѓани во служба на економските интереси на малкумина.

Молкот на СДС за отписот на 2.000 тони јачмен и пченица од стоковите резерви на државата е потврда за тоа дека станува збор за криминал вреден 800.000 евра, вели Валентин Манасиевски, член на ЦК на ВМРО-ДПМНЕ.

„Откако по направениот записник на Димковски, а потоа донесен и заклучок од страна на владата на Заев, Филипче и Николовски, за отпис на 2.000 тони јачмен и пченица, од СДС нема ниту осуда ниту оградување.

Напротив, тие влегоа во штитење на овој криминал на нивниот ментор Заев и учениците Филипче и Николовски.

Зошто СДС го брани овој криминал вреден близу 800.000 евра? Дали оваа пченица и јачмен преку посредници има достигнато двојна цена на црн пазар во соседна држава? Дали ова трио на Заев, Филипче и Николовски, се има добро нафатирано, а жртвеното јагне во случајот е Димковски“, прашува Манасиевски.

Итрината, додава тој, оди дотаму да по само некое време, тогашната влада мислејќи дека ќе го покријат за нив, ситниот криминал, потпишале 2 тендера за 20.000 тони јачмен и пченица.

И ова, како што оценува, СДС пробува да го штити.

„Знаеме дека во СДС останаа неколкумина во врвот кои се продолжена рака на Заев и Филипче. Се додека овие луѓе не заминат, СДС ќе има полн багаж зад себе“.