Македонија
Ивон: Македонија ќе урива рекорди во пристапните преговори
Преговорите на Македонија за членство во Европската унија ќе бидат повеќе спринт отколку маратон, и поради тоа треба да се искористи пристапниот дијалог на високо ниво за да се има напредок во интеграцијата.
Ова го порача британскиот амбасадор Кристофер Ивон, кој во вторник учествуваше на конференцијата „Проширувањето соочено со новите предизвици во Европската унија“.
Ивон смета дека, доколку главните задачи бидат завршени во текот на пристапниот дијалог, Македонија за рекордно време ќе ги заврши пристапните преговори штом тие почнат.
„Овој дијалог на високо ниво ни нуди вистинска можност на Македонија во нејзиниот напредок кон Европската унија. Обединетото Кралство сака да ги види преговорите отворени. Немаме никаков приговор кон тоа, меѓутоа сé додека не дојде датумот кога Советот заеднички ќе донесе одлука, сметам дека овој дијалог на високо ниво дава можности за реформи на значаен начин, бидејќи доколку тие се случат, кога ќе почнат преговорите брзината на патувањето на Македонија ќе урива рекорди, ќе биде повеќе спринт, отколку маратон откако ќе се отворат преговорите“, рече Ивон.
За шефот на македонската дипломатија, Никола Попоски, членството во Европската унија не носи решенија за сите проблеми, но дава можност за нивно надминување. „Со членството во Европската унија не ги решавате сите проблеми. Членството во Европската унија ви отвара можност, доколку имате капацитет и доколку можете да генерирате решенија, да имате подобра иднина на подолг рок, но само посебе не е решение. Не смееме да излеземе од оној концепт на клучна идеја дека Европската унија е мировен проект, е проект кој е фокусиран да ни обезбеди мир, стабилност и просперитет“, рече Попоски. Смета дека членството на Македонија во ЕУ ќе значи постабилна и попросперитетна Унија.
„Главната агенда е дека ние имаме најсилна поддршка за членство во Европската унија, дека тоа преставува исклучително кохезивен фактор за нашето општество и дека Република Македонија дефинитивно може да ја направи Европската унија побогата, постабилна и попросперитетна по членството отколку пред нејзиното членство. Не би требало тоа да ни создава одреден комодитет и да ни создава перцепција дека и сме потребни на Европа сами посебе и дека можеме да се опуштиме, бидејќи по дефиниција би требало да припаднеме во тоа семејство. Мислам дека спротивната логика е многу повалидна – дека треба да работиме многу упорно, многу напорно и покрај неправдата со којашто објективно се соочуваме во определен временски период“, рече Попоски.
За Дејвид Кален, шеф на Одделот за Република Македонија при Директоратот за проширување на Европската комисија, проширувањето останува стратешки интерес за Унијата. Порача дека кризата нема никакво влијание врз проширувањето, туку тоа во најголема мера зависи од сработената домашна задача на земјите-аспиранти.
„И покрај предизвиците, сепак, процесот на проширување не е обесхрабрен. Моментумот може да се задржи ако се има вистински напредок, благодарение на напорите на земјите на западниот Балкан. Со поддршка на Европската унија, регионот е поблиску до Европа“, рече Кален.
Конференцијата, одржана по повод Денот на Европа, е во организација на Европското движење во Република Македонија, а под покровителство на Собранието. /крај/мф/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: ВМРО-ДПМНЕ ќе го истреби криминалот и за истиот ќе има одговорност, затоа ни треба поддршката од граѓаните на 8 мај за број 2
Многу е важно да се земе активно учество во овие избори. Резултатот во првиот круг беше би рекол историски. Владата е делегитимирана и треба да оди во опозиција и СДСМ и ДУИ, рече лидерот на ВМРО-ДПМНЕ, Христијан Мицкоски на денешниот митинг во Неготино.
Мицкоски посочи дека СДСМ денес се претвори во обичен измеќар на ДУИ, затоа ова што им се случува не е случајност.
„ДУИ и СДСМ мора да одат во опозиција. Мора да престане праксата ДУИ ќе биде малку со ВМРО-ДПМНЕ, па со СДСМ. ДУИ сака да го понижи македонскиот народ и да ја клекне на колена Македонија. Ми пречи криминалот на ДУИ. Тие повеќе од 20 години крадат од сите вас. Тие повеќе од 20 години ја урнисуваат Македонија. СДСМ мислеа дека противник им е ВМРО-ДПМНЕ, а не гледаа што прават од ДУИ“, кажа Мицкоски.
Затоа, додаде Мицкоски, сакам да предупредам за нешто за што имам информации дека се случува.
„Банди од ДУИ обиколуваат граѓани. Ќе се обидат да го купат гласот, ќе се обидат ДУИ да има пратеник во изборните единици 3 и 4. Секој бандит кој ќе нуди пари, практично ви нуди ваши пари, украдени од вас. Предупредувам да не биде дека не сум кажал. Мои браќа и сестри се сите граѓани, но нема простор за криминалците. Тие знаат што ги чека. Јас нема да правам пакт со криминалот, туку ќе го истребам. Мора да има одговорност за криминалот“, вели Мицкоски.
Мицкоски посочи дека ќе тропне на секоја порта.
„Македонија е држава на лојални граѓани без разлика на етничка припадност. Ќе побараме поддршка, ќе замолиме, ќе предупредиме дека ова се клучни избори. Секој човек ќе го убедам дека секој мора да излезе да ставиме крај на ова уништување на државата“, кажа Мицкоски.
Мицкоски укажа дека ова е момент да се обединиме.
„Ги повикувам сите, поддржувачи на СДСМ, оние кои останаа дома, сите да излеземе против оваа власт. Вашата доверба нема да ја изневериме потребна е поддршка за Македонија“, рече Мицкоски.
Македонија
Мицкоски сфати каде е тежината на албанскиот глас, вели Таравари
Ккандидатот за претседател од коалицијата „Вреди“, Арбен Таравари, вели дека е добро што ВМРО-ДПМНЕ ја сфатила, како што посочува, тежината на гласот и на пратениците Албанци.
Во напишаното на социјалните мрежи Таравари истакнува дека сега ќе се фокусираат на изборите, а после 8 мај при формирање на новата влада ќе се водат од националниот интерес на Албанците, од итната потреба да се исчисти власта од корупција и од нивната непреговарачка прозападна ориентација.
„Предлогот на Мицкоски покажува дека и ВМРО сфати каде е тежината на гласот и на пратениците Албанци.
Но, нашиот фокус како коалиција и како партија е работата за изборите на 8 мај, за најголем број мандати.
По изборите ќе се водиме од националниот интерес на Албанците, од итната потреба да се исчисти власта од корупција и од нашата непреговарачка прозападна ориентација“, порачува Таравари.
Ние како „ВЛЕН“, додава тој, сме пообединети од кога било. „Нашиот глас е мнозинство од гласовите на Албанците. Нашите мандати одат кај пратениците Албанци. Бидејќи ние го штитиме напредокот на Албанците, не ги продаваме и не ги купуваме“’, дециден е Таравари.
Македонија
(Видео) Пендаровски: За бојкот тие нека му ја мислат, во Крушево дојдов за да ви кажам дека и тука и во цела Македонија ќе победиме
Кандидатот за претседател Стево Пендаровски денеска ја продолжи кампањата со средба со жителите на Крушево.
„Борбата почнува од нула, како да немало прв круг“, рече Пендаровски пред крушевчани негирајќи ги обвинувањата на опозицијата дека ќе го бојкотира вториот круг од претседателските избори.
„Дали е логично да дојдам јас во Крушево, ако мислам да бојкотирам? Јас мислам со сите вас да победам! Кој сака нека бојкотира, ниту сум бојкотирал 2014-та, ниту 2019-та, ниту 2016-та, ниту оваа 2024-та нема да бојкотирам. Тие нека му ја мислат за крајниот резултат. Ние сите го знаеме и наместо бојкот ние ќе прославуваме’, истакна Пендаровски денеска во Крушево.