Владата во наредните три години ќе реконструира и реновира 132 основни и средни училишта во 49 општини низ земјата, за што се обезбедени 45 милиони евра или по 15 милиони евра за секоја година, соопшти во неделата портпаролот на Владата на РМ, Александар Ѓорѓиев.

Како што нагласи на прес-конференција владиниот портпарол , станува збор за вкупно 192 реконструкции и реновирања на прозорци, покриви, подови, инсталации за греење и на санитарни јазли, коишто ќе започнат веќе од годианва.

Ѓорѓиев соопшти дека до крајот на јули ќе биде избран проектант за градежните зафати, а по подготовката на проектите ќе биде отворена и постапка за изведувач на градежните работи и надзор.

„По изборот на проектант треба да бидат изготвени проектите, и да се отвори постапка за изведувач на градежни работи и надзор и да се отпочне со градба, за што веќе се обезбедени финансии. Целта на проектот е создавање на современи услови за извршување на наставниот процес, енергетски ефикасни училишта“, рече Ѓорѓиев.

„Училиштата се определени преку јавен повик и преку нивна физичка проверка. Целта на проектот е да се создадат современи услови за настава во енергетски ефикасни училишта. Ќе бидат опфатени различни општини, независно од составот на населението или од политичката припадност на градоначалникот“, објасни владиниот портпарол.

Според програмата на Владата, во североисточниот, источниот и вардарскиот регион со реконструкции ќе бидат опфатени 36 училишта, во југозападниот и југоисточниот 21 училиште, во пелагонискиот и полошкиот регион 33, а во скопскиот регион 42 училишта.

Само во главнито град Скопје ќе бидат реконструирани и реновирани 34 училишта, од кои шест во Чаир, по пет во Карпош, Аеродром, Гази Баба и во Сарај, по три во Кисела Вода, Бутел и Центар и две училишта во општината Ѓорче Петров.

Меѓу 132-те училишта коишто ќе бидат реконструирани или реновирани, единаесет се наоѓаат во Куманово, седум во Битола, шест во Гостивар, по пет во Охрид, Струга и Тетово, четири во Струмица, по три во Прилеп и Крива Паланка.

Ѓорѓиев, меѓу другото, информираше и дека во завршна фаза се изградбите на новото основно училиште во Аеродром, новото средно училиште во Шуто Оризари, училиштето „Страшо Пинџур“ во Вевчани. Станува збор за училишта коишто комплетно се нови и градбата се очекува да заврши најдоцна во октомври, а инвестицијата изнесува околу 3,5 милиони евра. Училиштето во скопската општина Чаир ќе биде завршено на почетокот на следната година и за него се одвоени околу милиони евра или вкупно 4,5 милиони евра за четири комплетно нови училишта.

Владиниот проект предвидува дека во наредниот период ќе продолжи изградбата и на монтажните училишта во руралните средини, како и изградбата на училишните спортски сали низ цела држава.

Во октомври, како што најави Ѓорѓиев, ќе биде завршен и новиот комплекс на студентскиот дом „Стив Наумов“, на локацијата со површина од 15.100 квадратни метри, на местото од запуштените бараки, ќе се добијат нови 2000 квадратни метри за сместување на студенти. Партерното уредување е со површина од 13.205 квадратни метри, а објектите се организирани во осум блокови со два типа објекти, односно шест објекти во кои ќе се обезбедат услови за 28 студенти во 10 соби и два објекта во кои ќе се обезбедат услови за 18 студенти во шест трокреветни соби. Вкупниот сместувачки капацитет ќе биде за 204 студенти, а вкупната инвестиција изнесува милион евра./крај/со/мф