Амнестијата на Хашките случаи, меѓуетничките затегнати односи, политичката криза во владата, како и економските проблеми во државата се главните аргументи на СДСМ на денешната расправа по иницијативата за гласање доверба на Владата.

Игор Ивановски и Јани Макрадули ја имаа честа да ги изнесат основните аргументи за иницијативата за гласање доверба на Владата.

Според Ивановски, економијата во државава е на многу ниско ниво, дека Владата не ги плаќа своите обврски, не ги почитува законските обврски за враќање на ДДВ, секој на секого должи, повеќе од половината млади се невработени.

„За оние кои останаа во државава и не со одлеаја од неа, нема работа, нема странски инвестиции, а ако не праќаат пари од дијаспората луѓето нема од што леб да јадат“, рече Ивановски.

Тој потсети дека ВМРО-ДПМНЕ ја направила Македонија најмизерна држава во светот, со 32 отсто сиромашни луѓе, а згора на тоа струјата два пати поскапе, заради владините ЕЛЕМ, МЕПСО и ЕВН, поради увоз на скапа струја од надвор.

„Не се живее со 60 денари на ден“, предупреди Ивановски.

Тој рече дека нафтата и нафтените деривати поскапеа заради тоа што ОКТА се продаде, дрвата ги нема или се скапи заради илегална сеча, од кои најмногу за извоз во Грција, платите останале исти или се намалувале.

„Сите чекаа помош од владата, но место помош добиваат игнорирање, постмев и владин арач. Додека луѓето немаат пари за леб, вие отварате нови споменици, бисти, игралишта, а парите на фирмите не ги враќате, но за луксузни патувања имате“, обвини Ивановски.

СДСМ смета дека на тој начин не се злоупотребуваат парите на само овие граѓани, туку и на следните неродени генерации Македонци.

Обвини дека милијарда и 250 милиони евра задолжување се направени за една година, а изградени се само седум километри пат за шест години.

Според СДСМ оваа влада е прва што уставното право на штрајк се укина со судска одлука.

„Граѓаните во болница влегуваат како во банка, за да ги платат услугите им треба кредит“, рече Ивановски.

Според него, земјоделците немаат алишта и храна, а луѓе блиски до власта со скапи костими и очила лажно пријавуваат одгледување лешници, домати, компири, за да земат субвенции, но и субвенциите стигнуваат по година до две, а се бара од земјоделците да плаќаат ДДВ веднаш.

Тој ја нарече актуелната власт злосторничко здружување на Влада на Македонија, затоа што таму бил најголемиот криминал, а за сопственици на медиум, беа пресудени вкупно 100 години затвор..

„И Државниот завод за ревизија не може да го сопре криминалот и корупцијата, па мора да констатира незаконско работење и трошење на народните пари“, рече Ивановски.

Секако не изостана и критиката за проектот Скопје 2014, во кој „за врби во Вардар се дадоа 280 илјади евра, а истата врба покрај сите реки расте без пари“. Од друга страна за Прометеј и 100 метри ограда на мост се дадоа 2,5 милиони евра, а само во Македонија на уметник за дело се дава хонорар од три милиона евра. Криминал, партизирано судство, партизирана администрација, контролирани медиуми, еднакво на Владата на Груевски“, рече Ивановски.

Обвини дека се судрија коалициските партнери ВМРО-ДПМНЕ и ДУИ околу законот за бранители, а сé почнало со припадници на АРМ, „која треба да е чувар на чест„`.

„Претседателот побара истрага, но Бесими си тераше по свое“, рече Ивановски.

Рече дека незаконски се менуваа имиња на училишта, се судрија градоначалници, а родителите и децата се сред тоа; се интонира албанска химна во македонските училишта.

Праша кој раководи со државата, која и каде се употребува химна, како се викаат училиштата во Чаир, дали се согласуваат македонски и албански ученици да учат заедно во една паралелка, има ли полиција, кој го води образованието?

„Ќе престане ли оваа опасна игра и ќе се зафатите ли со работа да ја оправдате довербата… додека ви трае власта, до следните вонредни избори..“,рече Ивановски.

Неговиот партиски колега Јани Макрадули рече дека граѓаните сакаат стабилни меѓуетнички односи.

„Од пратениците зависи дали ќе изберат ваша власт или иднина за сите фамилии“, рече Макрадули.

Министерот за транспорт и врски, Миле Јанакиески, се почувствува повикан да даде одговор за состојбите во својот ресор па рече дека до 2007 година, воопшто не се спомнуваше Законот за електронско јавно наддавање.

„Јавни наддавања немаше, а се случуваа договори во четири очи. Немаше објави во весниците. Се продаваа парцели по 20 евра во центар, а сега и по 3.000 евра. Милијарда и 300 милиони евра инвестиции се чека од продажбата на земјиште, дадено во владение на Општините“, рече Јанакиески.

„Греотка… ова го смисливте вие… Вие сте најкорумпираниот министер во владата… Додека ние дебатираме на „Партизанска“ има тепачка во автобус 22 меѓу Македонци и Албанци, сериозна е работата“, реплицираше Макрадули.

Според вицепремиерот Владимир Пешевски, она што е направено во минатиот период во економијата се аргументи сами за себе.

„Нето платите од 2006 до 2012 година имаат тенденција на зголемување, на нето плата до 52 отсто зголемување. Се донесе Закон за минимална плата, Закон за енергетска сиромаштија, со парична помош за енергенси. Земјиште за 1 евро по метар квадратен. Социјалната помош зголемена за 32 отсто, субвенциите од 6 милиони се зголемија на 130 милиони“, рече Пешевски, а потсети дека стапката на невработеност во 2011 била 31,2 отсто, додека во 2005 година 37,5 отсто, а таа година вработени имало 400 илјади, додека во 2012 година, таа бројка се зголемила на 650.000.

Министерот за надворешни работи Никола Попоски, рече дека Република Македонија никогаш не била поподготвена за почеток на преговори од денес, не била побитен фактор во НАТО. Во овој момент Македонија ги има сите аргументи за почеток на преговори.

„Денеска имаме интерпелација, која треба да ги заштити СДСМ од предвремени избори. Владата во овие неколку месеци се наоѓа во интензивна економска акција. Најавите за позитивен извештај се сè почести. Филе е задоволен од реформите. Имаме почетоци на изградби на фабрики“, рече пратеникот од ВМРО-ДПМНЕ, Илија Димовски.

Тој им порача на пратениците од СДСМ дека го промашиле нивното Работно лето, каде спиеле кај нивни земјоделци, а од Битола носеле симпатизери во Ресен за да биде собирот помасовен.

„Вие се плашите од брзи вонредни избори“, рече Димовски.

Се чудеше, како не успеале да пофалат ниеден проект на Владата, ниту зголемувањето на пензиите, ниту бесплатните учебници, зголемените субвенции, ниту подновувањето на железницата…

Расправата по иницијативата за гласање на доверба на владата сè уште трае и се очекува да приврши пред полноќ, кога свое обраќање ќе има премиерот Никола Груевски, по што ќе следи гласањето./крај/мф/бб