Македонија
Груевски го честита 23.Октомври – Ден на македонската револуционерна борба

Македонскиот премиер Никола Груевски, на граѓаните на Македонија им го честита 23.Октомври – Денот на македонската револуционерна борба.
„Пред нас е чествувањето на денот на кој пред 119 години беше формирана Македонската револуционерна организација. По тој повод, од името на Владата на Република Македонија, и од свое лично име, сакам на сите граѓани во Република Македонија и во дијаспората, да им го честитам големиот државен празник, 23-ти Октомври – Денот на македонската револуционерна борба“, вели Груевски во честитката.
Премиерот потсетува дека „организираното дејствување и мотивот на нашите предци за создавање на сопствена, слободна и независна македонска држава претставуваат едни од најсветлите моменти во македонската историја. Таквиот идеал, со посебна жестина во сите свои манифестации, избликнал сред нашиот народ кон крајот на 19-тиот и почетокот на 20-тиот век, кога добива и карактеристика на инспирирано, организирано интелектуално и вооружено движење, чија основна цел се слободата и правдата. Симбол на таквиот изблик е токму Внатрешната Македонска Револуционерна Организација, чие основање се случило токму на 23-ти Октомври 1893 година“.
Според него, празнувањето на овој ден, претставува вистински израз на почит кон големите дела на македонската историја.
„Под крилото на Внатрешната Македонска Револуционерна Организација, биле остварувани идеалите и реализирана борбата на народот за достоинство, за слободата, правдата и човечките права. ВМРО израснала во вистински култ на македонскиот непокор, и Организација која во својата суштина се темелела на вредностите, цврсто го почитувала моралот, соработката и почитувањето со останатите народи кои живееле на овие простори. Оваа организација е извор на бројни легендарни подвизи на храброст и саможртва на македонските револуционери, но и на високо интелектуални исчекори на полето на политичката и општествена мисла“, вели Груевски.
„Со своето дело, илинденската генерација го направи достапен сонот за слободата, сон кој продолжи да се сонува од сите следни генерации, за конечно да стане реалност на заседанието на АСНОМ во 1944 година и целосно да се потврди на референдумот за независност на Македонија во 1991-та година. Наша обврска е да ја продолжиме изградбата на нашата Татковина Република Македонија во силна, модерна и напредна држава, член на Европската Унија и НАТО. Дострелот на македонската револуционерна организација е пример за восхит и почит! Нека е вечен и вековит споменот за Македонските револуционери! Нека е честит големиот празник 23-ти Октомври!“, завршува македонскиот премиер./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ИК на ВМРО-ДПМНЕ: Мицкоски да предложи нови кадровски решенија, одењето на Таравари значи паѓање на уште една маска

Извршниот комитет на ВМРО-ДПМНЕ одржа седница на која се дискутираше за актуелната економска и политичка состојба во државата
Во рамки на седницата, Извршниот комитет го овласти претседателот на ВМРО-ДПМНЕ, Христијан Мицкоски, да предложи нови кадровски решенија на позициите што досега ѝ припаѓаа на Алијансата за Албанците, по одлуката на Арбен Таравари да ја напушти владината коалиција.
Овој чекор на Таравари беше оценето дека претставува уште еден доказ дека групата на заштитници на криминалот и корупцијата добива нови редови. „Уште една маска падна, уште една илузија беше разоткриена“, пишува во соопштението.
„На политичката сцена се појави нов, добро координиран марионетски квартет: СДС, Алијанса, ДУИ и Левица – различни имиња, но ист газда. Различни маски, но ист сценарист. ДУИ со години инвестираше во создавање на лажни политички конкуренти кои всушност се негови продолжени раце. Така ги добивме СДС и Алијансата на Таравари – партии со речиси идентичен рејтинг, подготвени да бидат потрошени во функција на обидот за враќање на ДУИ на власт. И како што е случај со секоја потрошна роба, така и овие ќе бидат фрлени на политички отпад кога ќе ја завршат својата задача“, велат од ВМРО-ДПМНЕ.
Според партијата, жално е што токму ваквите политички привезоци најдобро се снаоѓаат во улога на сервилни помошници – без став, без визија, без достоинство.
„Но, да биде јасно: државата не оди во провалија. Од провалијата ја вадиме. А тоа што ги боли е фактот што веќе нема амнестии, нема рекети, нема наместени тендери. Боли што правдата конечно тропа на нивната врата. На крајот, нека викаат колку сакаат. СДС, ДУИ и нивните политички вазали веќе се осудени – од граѓаните на изборите. А вистинскиот суд – оној на правдата – допрва доаѓа“, се наведува во соопштението.
Македонија
Викендов дожд со температури под просекот за овој период од годината

Времето утре ќе биде сончево со мала до умерена облачност. Ќе дува слаб до умерен ветер претежно од северен правец. Минималната температура ќе биде во интервал од 2 до 9, а максималната ќе достигне од 16 до 24 степени, информира УХРМ.
Во Скопје, сончево со мала до умерена облачност и со слаб до умерен ветер од северен правец. Минималната температура ќе се спушти до 7, а максималната ќе достигне до 24 степени.
Во четврток кон крајот на денот, во текот на ноќта и во петок под влијание на влажен бран ќе има врнежи од дожд, кои локално ќе бидат пообилни. Во деновите од викендот ќе се задржи променливо облачно време со повремен локален дожд. Температурите ќе бидат под просекот за овој период од годината.
Македонија
Универзитетот „Св. Климент Охридски“ – Битола ќе добие Факултет за медицина

Владата ја разгледа и усвои информацијата за потреба за основање на Факултет за медицински науки и здравство при Универзитетот „Св. Климент Охридски“ – Битола.
„Формирањето на Факултетот за медицински науки и здравство како единица во состав на Универзитетот „Св. Климент Охридски“ – Битола претставува стратешка неопходност за унапредување на здравственото образование особено во Пелагонискиот и Југозападниот регион на Република Северна Македонија“, велат од Владата.
Новоформираниот факултет ќе има задача да биде правен наследник на Високата медицинска школа, каде освен тригодишни студии ќе може да се акредитираат четиригодишни студиски програми по медицински сестри и акушерки.
Од Владата велат дека имајќи го предвид фактот дека е потребно време да се испочитуваат мислењата од сите надлежни институции, како на пример да се разгледа проектот за основање на Факултетот за медицински науки и здравство како единица во состав на Универзитетот „Св. Климент Охридски“ – Битола од страна на Одборот за акредитација на високото образование, да се донесе закон за основање, и да се испочитува членот 149 од Законот, каде е наведено дека запишувањето на студии се врши врз основа на јавен конкурс кој го објавува универзитетот, односно самостојната висока стручна школа кој ги реализира студиите најмалку пет месеци пред започнувањето на наставата, Министерството за образование и наука предложи Факултетот за медицински науки и здравство да отпочне со работа од студиската 2026/2027 година, а во меѓувреме да се завршат сите постапки согласно Законот за високо образование.