Поглаварот на Македонската православна црква (МПЦ) , г.г. Стефан изјави дека нацрт договорот од Ниш меѓу Српската православна црква (СПЦ) и МПЦ е завршен и не важи.

Според него, двете Цркви мора да стартуваат со нешто нов, што е прифатливо за двете страни.

„Потребно е и двете страни да имаат расположение за решавање на спорот меѓу СПЦ и МПЦ, но засега и покрај низата децениски  средби и разговорите договарањето за решавање на спорот се уште е на својот почеток. Мораме да стартуваме со нешто друго, што би значело прифатливо од двете страни за разлика од тој веќе спомнат текст од Ниш“, рече г.г. Стефан по осветувањето на нова црква „Свети Климент Охридски“ во Штип.

Тој констатираше дека наместо духовниците да ги поучуваат државниците за црковни работи, се случило обратното.

„По најавите на претседателот на Србија, вие знаете дека веќе имаше изјави од архиереј на МПЦ и од Синодот, имаше и изјави од архиереј на Српската православна црква и од самиот патријарх на неговата светост господин Иринеј и веројатно и двете страни ќе направат она што е потребно да го направат и веројатно ова ќе го имаат како поука наместо духовниците да ги поучуваат државниците за црковните работи се случи обратното, за што им благодарам“ рече г.г. Стефан.

Toj рече дека во децениските средби македонската црква предлага и стои зад самостојноста и автокефалноста на Македонската православна црква, онаква каква што ја имала Охридската архиепископија, сите возобновени цркви, како што е СПЦ, поточно поранешната Печка епископија, Трновската патријаршија – денеска Бугарската православна црква.

Минатата недела во посета на Македонија дојде српскиот претседател, Томислав Николиќ и заедно со македонскиот претседател, Ѓорге Иванов се заложија да помогнат во решавањето на проблемот меѓу МПЦ и СПЦ.

Српскиот патријарх Иринеј после посетата изјави дека прифаќа преговори со МПЦ, но во согласност со договорите кои претходно ги имале двете цркви, споменувајќи го и Нишкиот договор од 2002 година.

Овој договор СПЦ го прифати, а за македонската страна е оценет како работен документ што нема обврзувачки карактер.

Поглаварот останува на ставот дека во чистењето на фреските во храмот „Свети Димитрија“ бил необичен настан, па и чудо. /крај/со/мф/крај/со/мф