Министерката за внатрешни работи Гордана Јанкулоска во вторник ги посети припадниците на сообраќајната полиција при СВР Скопје.

Во текот на состанокот со челните луѓе на оваа организациона единица, министерката Јанкулоска беше информирана од нивна страна дека новогодишната ноќ минала исклучително мирно без никакви посериозни инциденти, тенденција којашто е карактеристична за изминативе неколку години.

Од страна на сообраќајната полиција беше посочено дека во текот на ноќта и утрово на подрачјето на Скопје е регистрирана една сообраќајна несреќа со смртни последици, а во другите осум пријавени незгоди, шест минале со материјална штета, а во две учесниците во истите се здобиле со телесни повреди.

Покрај ова од страна на сообраќајната полиција при СВР Скопје беше речено дека во изминатата 2012 година се забележани исклучително позитивни резултати во поглед на сообраќајната безбедност на подрачјето на главниот град, односно статистички гледано за половина или за педесет отсто е намален бројот на сообраќајни несреќи со смртни последици.

Имено, во 2011 година на подрачјето на Скопје биле регистрирани 52 сообраќајки со смртни последици во кои што животот го загубиле 57 лица, а лани евидентирани се 27 сообраќајни несреќи со смртни последици во кои настрадале 29 лица. Притоа најголем дел се пешаци, потоа возачи, совозачи и велосипедисти.

Исто така беше презентиран и податокот дека е намален и бројот на сообраќајки со тешки телесни повреди. Така ако во 2011 година на подрачјето на Скопје се регистрирани 229 сообраќајки со тешки телесни повреди во кои повредени бие 290 лица, лани евидентирани биле 209 сообраќајки во кои 237 лица се здобиле со тешки телесни повреди.

Според сообраќајната полиција ваквиот позитивен тренд на подобрување на сообраќајната безбедност во голема мера се должи на континуираното превентивно, но и репресивно делување на полицијата, но поради очигледното влијание што врз свеста на граѓаните го има стартот на проектот “безбеден град“, односно видео надздорот на скопските сообраќајници. /крај/со/ст