Синдикатот на новинарите и медиумските работници во понеделник организираше колективно извинување до претседателот на Собранието Трајко Вељаноски и премиерот Никола Груевски, додека од владејачката ВМРО-ДПМНЕ одговорија дека станува збор за повеќе партиско, отколку синдикално дејствување.

„Се извинуваме за секое ненарачано и нетематско прашање што би можеле да го поставиме на тематска прес-конференција; затоа што доаѓаме на време на прес-конференции, затоа што Македонија падна на најниското ниво според медиумските слободи и лично ќе се вложиме Македонија да се повлече од какви било листи за мерење на слободата на печатот и од сите анкети за кои сме известувале, или ненамерно би можеле да известуваме, а во кои Македонија не е во позитивен контекст и за секое сторено и идно прегрешение – волно и неволно“, иронизираше претседателката на ССНМ, Тамара Чаусидис. во обраќањето до премиерот Груевски.

Оваа акција ССНМ ја организира откако Вељаноски побара извинување од главната и одговорна уредничка на Утрински вест за објавената анкета за работата на Собранието и инцидентите на 24-ти декември и откако Македонија беше рангирана на 116 место на извештајот на невладината организација „Репортери без граници“.

„Му се извинувам на претседателот на Собранието на Република Македонија, Трајко Вељаноски затоа што не ги манипулирал резултатите од анкетата за наводните инциденти на 24-ти декември 2012 во Собранието и истите ги повлекувам. И инцидентите, и резултатите“ се вели во извинувањето.

На ова реагираше владејачката партија, ВМРО-ДПМНЕ. Според нив дел од новинарите во име на СДСМ се пресметувале со Вељаноски и Груевски и повеќе личеле на партија отколку на синдикат.

„Овие луѓе денес, ја покажаа својата опседнатост од политиките на Бранко Црвенковски. Тие  покажаа дека најмалку можат да се повикуваат во името на независни новинари. ВМРО-ДПМНЕ како партија ги поздравува оние на кои политиката им е очигледно подрага отколку новинарската професија и им порачуваме да соберат потписи со кои ќе формираат политичка партија со која ќе настапат на избори, за да си го видат својот личен углед и авторитет  помеѓу народот“. се вели во писмената реакција на владејачката партија./крај/фф