Министерот за информатичко општество и администрација Иво Ивановски во понеделник одржа состанок со претставници на групацијата Латанзио, предводени од директорот Џовани Мастрандреа и од Канцеларијата на ЕУ во Скопје.

Во наредните 18 месеци, за зајакнување на институционалните капацитети и за обуките што ќе се спроведуваат во администрацијата, ќе бидат доделени средства во висина од 1,1 милион евра, обезбедени од Европската Унија.

„Во ИПА проектот се вклучени експерти од компании од Австрија, Шпанија и Италија. Со нивна помош, во наредните 18 месеци очекуваме да бидат спроведени голем број обуки предвидени со Стратегијата за реформа на јавната администрација, која Владата ја донесе пред неколку години“, изјави Ивановски.

Овие финансиски средства ќе користат и по донесувањето на новиот Закон за јавната администрација кој е во подготовка, со што ќе се обезбеди поголема услужност на административните работници кон граѓаните. Притоа, се очекува граѓаните да бидат многу позадоволни од услугите кои ги добиваат од сите државни институции.

„Средствата ќе бидат корисни за да се направат обуките на раководителите, бидејќи тие ќе мора најсоодветно да ја познаваат материјата што ќе ја опфаќа новиот Закон за администрација. Исто така, тие ќе треба да ги спроведуваат реформите што ќе бидат предложени во овој закон“, додаде Ивановски. /крај/со/мф