Македонското министерство за одбрана со својата Стратегија за стратешки комуникации има јасно дефинирани цели – отворена и ефективна комуникација со граѓаните, почитувајќи ги принципите на веродостојност, разбирање, дијалог и единство, истакна министерот Талат Џафери, на отворањето отворање на Конференцијата за стратешки комуникации која се одржува од понеделник до вторник во Домот на АРМ во Скопје.

Пред присутните претставници на министерствата за одбрана и јавните сервиси од регионот, министерот Талат Џафери ги посочи и основните насоки коишто ги дефинираат односите со јавноста во рамки на Министерството за одбрана.

„Ние сме насочени кон ефикасното практикување на транспарентноста и навременоста, како наш патоказ во пренесувањето на суштинските пораки кон јавноста, на интер-институционално, национално и меѓународно ниво“, рече Џафери.

Директорот на RACVIAC – Центарот за безбедносна соработка, Бранимир Мандиќ, во своето обраќање посочи на фактот дека токму првиот чекор кон реализација на потенцијалот на стратешката комуникација за придонес кон националната безбедносна стратегија е да разбереме што таа значи и каков е нејзиниот однос кон целосната безбедносна стратегија. Како што додаде Мандиќ, земјите членки на НАТО и земјите кандидати за членство во Алијансата, имаат потреба од размена на знаење, искуство и научени лекции на полето на стратешките комуникации.

Портпаролката и раководител на односите со јавноста во ОБСЕ, Кети Бартон, пак, од своја страна посвети внимание на клучните елементи кои се своевидна база на комуницирањето, како начин за креирање на меѓусебна доверба со јавноста.

„Комуникацијата е дел од демократијата, а светот денес прерасна во еден комуникациски автопат“, истакна портпаролката на ОБСЕ, посочувајќи дека стратешките комуникации се базираат врз пронаоѓањето и пренесувањето на вистинската, клучната порака.

Истовремено Бартон, се осврна и на местото и влијанието на социјалните медиуми (мрежи) во современото општество, упатувајќи на фактот дека тие не смеат да бидат занемарени, односно дека тие се еден од најефикасните алатки за повеќенасочна комуникација со јавноста.

Конференцијата за стратешки комуникации, која се одржува во коорганизација на Министерството за одбрана и RACVIAC – Центарот за безбедносна соработка цели кон креирање на слика за значењето и предизвиците поврзани со стратешките комуникации, како и развивање на принципите за нивно практикување. Таа е трета активност посветена на унапредувањето на соработката и комуникацијата помеѓу институциите, јавните сервиси, меѓународните организации и тоа преку дијалог, размена на информации, гледишта и идеи./крај/мф/сн