Министерката за внатрешни работи Гордана Јанкулоска нема директна информација за предметот против Алил Демири и Африм Исмаиловиќ по кој постапува Судот во Приштина, но изрази незадоволство од евентуалната одлука тие да не бидат екстрадирани во Македонија за да им се суди за случајот „Монструм“.

„Немам точни податоци како постапувале судовите во Приштина, каква одлука донеле, но верувам дека одлуката е таква каква што вие ја презентирате и доколку тоа е случај навистина морам да изразам жалење за ставот на тамошните власти тие да не бидат испорачани на Република Македонија, рече министерката Јанкулоска.

Демири и Исмаиловиќ во Косово беа осудени на две односно две и пол години затвор за нелегално поседување оружје, со што се доведува во прашање нивната екстрадиција.

Јанкулоска апелираше да се направат дополнителни максимални напори тие да бидат екстрадирани во најкус можен рок.

Се уште е неизвесно дали Алил Демири и Африм Исмаиловиќ ќе бидат испорачани во Македонија. Доколку има жалби на денешната  пресуда ќе поминат најмалку неколку месеци додека да стане правосилна со што неизвесно е кога би се случила екстрадицијата.