Се навршија 12 години од потпишувањето на Рамковниот договор со кој се стави крај на воениот конфликт во Македонија во 2001 година и се постави рамка за меѓуетнички соживот.

Дванаесетгодишнината од потпишувањето на Рамковниот договор, како епилог на неколкумесечниот вооружен конфликт во земјава во 2001 година и ден кој го промени уставното уредување на Македонија, неколку години е датум кој единствено го одбележува партијата ДУИ, која произлезе во политичка формација од ОНА.

Годинава, прославата на 13-ти август, денот кога домашните политички лидери и меѓународни гаранти ставија параф на оваа рамка, ќе се одбележи скромно, со трибина на која ќе говори вицепремиерот Муса Џафери, првиот човек на Секретаријатот за одбележување на Рамковниот договор во владата.

Лани, на приемот што се одржа во Музејот на современата уметност на скопско Кале, улогата на „домаќин“ ја имаше ДУИ, но повторно не успеа да ги собере на исто место живите потписници на Охридскиот рамковен договор, како и највисокиот државен врв.

Во пресрет на дванаесетгодишнината лидерот на ДУИ, Али Ахмети, неодамна испрати писмо до меѓународниот фактор, адресирајќи го до меѓународни личности, кои беа вклучени во разрешувањето на воениот конфликт од 2001 година.

„И по дванаесет години од потпишувањето на Рамковниот договор, како и по повеќе од една деценија на заеднички капитални инвестиции од страна на меѓународната заедница и домашните власти, ви пишувам за да ви се заблагодарам уште еднаш за вашиот ценет придонес кон сите овие достигнувања. Оваа искрена и заедничка заложба донесе дијалог, мир, сигурност, стабилност, стабилни меѓуетнички односи и евро-атлантска перспектива за Македонија така што мојата земја го доби статусот на земја-кандидат за членство во ЕУ во 2005 година претежно како резултат на имплементирањето на Рамковниот договор“, е само дел од она што неодамна во писмо го наведе Ахмети и го испрати до Џорџ Робертсон, поранешен генерален секретар на НАТО, како и до повеќе други меѓународни личности, кои беа вклучени во разрешувањето на воениот конфликт од 2001 година.

Писмо со слична содржина тој упати и до Јаап де Хоп Шефер, Хавиер Солана, Питер Феит, Франсоа Леотар, Бернар Валеро, Џејмс Пердју, Kристофер Хил, Сорен Јесен Петерсен и до Даниел Сервер.

Ахмети нив ги покани да го искористат својот авторитет со пријателите и со институциите што придонеле многу во овие големи мировни процеси за да се капитализира голема заедничка инвестиција во Македонија во последнава деценија, преку постигнување на крајната цел, членство во НАТО и во Европската Унија. Лидерот на ДУИ им упати повик да се заложат ова прашање да се стави „во итно внимание на меѓународната заедница, за да почне дијалогот на високо ниво помеѓу Македонија и Грција“. Тој во писмото искажа загриженост бидејќи, како што рече, достигнувањата од дванаесетгодишниот процес може да се осуетат токму поради нерешениот спор на земјава со јужниот сосед.

На 13-ти август 2001 година во претседателската резиденција на Водно во Скопје Рамковниот договор го потпишаа тогашниот претседател на Република Македонија, трагично загинатиот Борис Трајковски, поранешниот претседател на ВМРО-ДПМНЕ и премиер Љубчо Георгиевски, претседателот на ПДП Имер Имери и тогашните претседатели на СДСМ, Бранко Црвенковски и на ДПА, Арбен Џафери.

Потписници на договорот, во својство на гаранти, беа и специјалните претставници на ЕУ и САД, Франсоа Леотар и Џејмс Пердју, кои учествуваа во преговорите.

Преговорите за Охридскиот рамковен договор се одвиваа во Вилата „Билјана“ во Охрид во јули и во август 2001 година, и во нив покрај потписниците учествуваа и Хавиер Солана, тогашен висок претставник на ЕУ за безбедносна и надворешна политика и Питер Фејт, претставник на САД, како и повеќе експерти меѓу кои професорите на Правниот факултет во Скопје, Владо Поповски и Љубомир Фрчковски./крај/мф