Претседателот Ѓорге Иванов донесе указ со кој претседателот на Полска, Бронислав Коморовски се одликува со Орден „ 8 Септември“. Во наредниот период Иванов ќе им додели Орден и на претставници од државно-политичкиот врв на Унгарија и на Чешката Република.

Орденот „8 Септември“ му се доделува на претседателот на Република Полска за исклучителни заслуги за развивање и зацврстување на пријателските односи и мирољубива рамноправна соработка меѓу Република Македонија и Република Полска, како и за афирмирање и јакнење на меѓународната положба и углед на Република Македонија.

Оваа година се одбележува дваесет годишнина од воспоставувањето на дипломатските односи меѓу Република Македонија и Република Полска. Двете земји во изминатиот период изградија односи на искрено пријателство, кое се карактеризира со меѓусебно разбирање и заемна поддршка на билатерален и мултилатерален план. Двете земји остваруваат плодна соработка во повеќе сфери од заемен интерес.

Орденот „8 Септември“ се доделува како израз на благодарност до полскиот народ и лидерите на Република Полска за негувањето и јакнењето на односите на пријателство и на соработката меѓу двете држави, за силната поддршка и помош во напорите за реализација на стратешките цели и принципиелниот однос кон уставното име на Република Македонија.

Коморски треба да ја посети Македонија на 10 и 11 септември, кога ќе му биде врачен Орденот.

На 25 јули 2005 година, Владата на Полска донесе одлука за признавање и употреба на уставното име на Република Македонија во билатералната комуникација. Не случајно претседателот Коморовски е првиот од Вишеградската група кој го добива овој Орден, бидејќи одлуката на Полска од 2005-та беше поттик и Унгарија и Чешката Република со одлука на нивните влади да ја потврдат и официјализираат практиката на обраќање кон Република Македонија со нејзиното уставно име во билатералната комуникација, информираат од Кабинетот на Претседателот.

Владата на Унгарија ваквата одлука ја донесе на 10 декември 2012 година, додека пак владата на Чешката Република одлуката со која ја потврди и официјализира досегашната пракса на обраќање кон Република Македонија со нејзиното уставно име во билатералната комуникација,  ја донесе на 12 февруари 2013 година.

Со Орден „8 Септември“ претседателот на Република Македонија во наредниот период ќе одликува и претставници од државно-политичкиот врв на Унгарија и на Чешката Република.

Одликувањата се во знак на благодарност до народите и лидерите на овие пријателски земји./крај/со/мф