Министерот за информатичко општество и администрација, Иво Ивановски, во петок се сретна со потпретседателот на корпорацијата Интел, Џон Дејвис, кој се наоѓа во посета на Република Македонија.

На средбата се разговараше за соработката во повеќе области, пред сè во информациско-комуникациските технологии и помошта за малите и средните претпријатија.

„Во рамките на Осмиот состанок на Комисијата за широкопојасен интернет и дигитален развој, кој во септември се одржа во Њујорк, со потпретседателот на Интел, Џон Дејвис го потпишавме Меморандумот за разбирање во областа на информатичката технологија за земјоделски услуги. Со него ќе се овозможи руралните микропретприемачи да им нудат услуги за земјоделците во руралните заедници со користење на компјутерски уреди. Денес договоривме одржување на работилиница за мали и средни препријатија, на која експерти од корпорацијата Интел ќе дојдат во нашата земја и преку пренесување на стручни знаења и искуства им овозможат на препријатијата нивните производи да бидат поконкурентни на странските пазари“, изјави по средбата министерот Ивановски.

Потпретседателот на Интел, Џон Дејвис, од своја страна истакна дека Македонија напредува во многу сфери поврзани со ИКТ секторите, пред сè образовните системи во земјата и нивната компјутеризација, со што се постигнува повисоко ниво на едукација и напредок во образованието.

„Сакаме да им помогнеме и на локалните компании во Македонија да ги користат новите технологии и новите софтвери за постигнување нивен поголем развој. Цениме дека работилницата која ја подготвуваме за малите и средните претпријатија ќе ги даде очекуваните резултати“, истакна Дејвис. /крај/со/мф