Претседателот на Република Македонија, д-р Ѓорге Иванов во рамки на одбележувањето на Светскиот ден на филозофијата, одржа предавање на Филозофскиот факултет во Скопје.

Претседателот Иванов изрази задоволство од можноста и честа да биде покровител на научниот собир на тема „Филозофијата денес“, во организација на Филозофскиот факултет при универзитетот „Св. Кирил и Методиј“ и Филозофското друштво на Македонија.

„За разлика од воздухот што го дишеме, водата што ја пиеме и храната со која се храниме, филозофијата, како и уметноста, не е неопходна за човековото преживување. Човекот може да преживее и без филозофијата. Но, филозофијата е една од оние нешта што му даваат вистинска вредност и смисла на животот и живеењето. Филозофијата го прави животот вреден“, рече претседателот Иванов.

„Да гледате во љубовта и пријателството корист, значи да ја изгубите смислата на пријателството и љубовта. Така е и со филозофијата – да гледате во неа корист, значи да ја изгубите смислата на филозофијата. Таа, иако е тешка, сепак, нé привлекува за да бидеме повеќе луѓе, односно да видиме како бескрајно сами себеси се надминуваме, или што би кажал нашиот свети Климент – да се престигнуваме по добрина. Кој имал можност да слуша или, пак, да чита дело на некој возвишен филозоф, лесно ќе се убеди во сево ова“, рече претседателот Иванов во предавањето одржано на Филозофскиот факултет во Скопје.

Претходно, претседателот Иванов одржа средба со деканот на Филозофскиот факултет, проф. д-р Горан Ајдински, како и со дел од учесниците на научниот собир./крај/мф/бб