Остануваме на намерата преку моделот на училиштен спорт да го зголемиме бројот на учениците што спортуваат од сегашните 5.000 на 50.000 во основното и средното образование, рече премиерот Заев при увидот во градежните работи за изведба на спортска сала при основното училиште „Јоаким Крчовски“ во Волково.

Се работи за спортска сала од 650 квадратни метри со вкупна вредност од 24 милиони денари (400.000 евра).

Во изјавата за медиумите премиерот истакна дека изградбата на оваа спортска сала е во духот на реформите во основното образование и новиот Закон за основното образование, каде што има тандем наставници за изучување на предметите по физичко образование како една од стратешките определби на Владата.

„Селото Волково и училиштето ‘Јоаким Крчовски’ првпат добиваат спортска сала по 60 години, која се гради од Министерството за образование и наука со помош и со поддршка на Општина Ѓорче Петров и ќе им служи на 367 ученици од село Волково и село Орман“, нагласи Заев.

Тој при увидот во градежните работи, кои се очекува да завршат во мај в година, беше придружуван од заменик-министерката за образование, Елизабета Наумовска, и градоначалникот на општина Ѓорче Петров, Александар Наумоски.

Новогодишната елка што е поставена на плоштадот Македонија ќе светне утревечер во 19:30 часот, а ќе почне со работа и новогодишниот базар „Винтерленд 2020“, соопшти Град Скопје. Со тоа, како што велат од Градот, во Скопје и официјално ќе почне празнувањето во пресрет на највеселиот ден во годината, а граѓаните ќе имаат можност да ја почувствуваат новогодишната магија и да уживаат во најразновидна забавна програма.

Новогодишните куќички на „Винтерленд“ се сместени на новиот плочник меѓу ГТЦ и плоштадот, а новогодишната програма ќе трае 25 дена – од отворањето на базарот, па сè до 31 декември, до дочекот на Новата 2020 година. Во близина на куќичките ќе биде сместена и мала сцена на која секојдневно ќе се организираат настани кои ќе го привлечат интересот на сите граѓани, без разлика на возраста. На овој простор ќе има и катчиња за детски игри, како и разновидни содржини од новогодишен карактер.

Во работните денови секој ден ќе има 2 часа детска програма која ќе почнува околу 16 часот, а подоцна ќе има 3 часа програма за возрасни. За време на викендите е планирана целодневна програма која ќе почнува точно напладне.

Градот Скопје ги поканува граѓаните утревечер да дојдат на плоштадот Македонија  од 17:30 часот да ја проследат детската новогодишна програма, а потоа, во 19:30 часот да присуствуваат на осветлувањето на новогодишната елка. Сите заедно да уживаме во културно-забавните содржини кои ќе ги збогатат деновите до најлудата ноќ.

Jавното обвинителство ја презентираше новата интернет-страница www.jorm.gov.mk, овозможена со финансиска поддршка од Мисијата на ОБСЕ во Скопје.

„Јавното обвинителство како орган кој ги гони сторителите на кривичните дела и се грижи за функционирањето на казнениот правен систем, има обврска јасно и транспарентно да ги споделува информациите со јавноста. Објавувањето на информациите нема само информативна функција за задоволување на јавниот интерес, туку преку нивна обработка и споделување, се реализира обврската за превентивно и едукативно дејствување врз состојбите со криминалитетот во општеството“, изјави jавниот обвинител Љубомир Јовески.

„Довербата на јавноста во вашата институција зависи од резултатите на вашата работа и од начинот на кој споделувате информации со јавноста за вашата работа. Довербата е емотивен одговор и најчесто треба да се заслужи, негува у да се одржува. Работата на јавното обвинителство мора да биде отворена и достапна за пошироката јавност, до степенот до кој тоа го дозволуваат законите и меѓународните стандарди“, истакна aмабасадорот Клеменс Која, шеф на Мисијата на ОБСЕ во Скопје.

Новата интернет-страница беше презентирана пред медиумите и пред јавните обвинители.