Во вакви метеоролошки услови, ние и да забраниме сè, ситуацијата нема да се промени во следните 10 дена, доколку немаме промена на метеоролошките услови. Сè има влијание, меѓутоа најголемо влијание имаат метеоролошките услови, изјави министерот за животна средина и просторно планирање Абдулаќим Адеми во Неделното интервју на Радио Слободна Европа.

Мора прво да имаме предвид дека ова не се случува поради градежните активности, ова се случува поради грејната сезона и поради метеоролошките услови, потенцирал тој.

Според Адеми, поголемите индустриски капацитети кои подлежат на А интегрирани дозволи во Скопје не работат во моментов, а работат само оние кои имаат еколошки стандарди и исто така и тие работат со помал капацитет, така што не може да се извлечат констатации врз основа на податоците од мерните единици кои некогаш имаат некој пик.

Доколку воведуваме целосна забрана во сообраќајот, треба да се исполнат некои други предуслови, истакнува министерот. Мора да имаме посебни паркинзи надвор од Скопје или надвор од Тетово, мора да имаме добро организиран јавен превоз кој ќе ги транспортира патниците од тие паркинзи до централното градско подрачје и со тоа може да создаваме други жаришта. Целта на владата не е да се помести лошиот квалитет на воздухот од центарот кон друго населено место. Се размислува за воведување на „пар -непар“, кој на некој начин би го намалил сообраќајот барем до 50 отсто, но тоа како мерка може да не потсети на некои претходни периоди кога се воведуваше „пар -непар“, но во тие години се воведуваше поради недостиг на нафта. Мора сите мерки кои ќе се предложат да немаат негативни ефекти во други територии и врз населението, изјави министерот Адеми во интервјуто за Радио Слободна Европа./крај/мф