За едните од историско значење, а за другите дефектен процес за менување на историјата и алатка за злоупотреба и демонски циркус на власта, беа оцените во петокот на претставниците од власта и опозицијата, вториот ден од собраниска расправа на која пратениците ги кршат копјата околу своите ставови по однос на начинот на спроведување на лустрацискиот процес до сега и предлогот на новиот состав на Лустрациската комисија во која СДСМ не предложи член од своите редови.

Изборот на членовите на Комисијата со кој се предвидува досегашниот претседател Томе Аџиев да добие уште еден петгодишен мандат само дополнително ги налути членовите на најголемата опозициона партија.

Илија Димовски од ВМРО-ДПМНЕ, пред пратениците истакна дека целта на лустрацијата е да се извадат досиејата од минатото а неговиот сопартиец, Димитар Стевананџија, истакна дека со процесот ќе се даде можност луѓето да ја дознаат вистината зошто некои луѓе пателе, некои режисери и писатели напредувале, а некои не…

Пратеникот Ивон Величковски од Либералната партија истакна дека на Македонија потребна и е лустрациска комисија и процес на лустрација кој нема да предизвикува тешки поделби. Според него. целта на Комисијата не е прочистување на историјата, туку на општествената свест и совест.

Сузана Салиу од ДУИ посочи дека главна жртва на комунизмот биле Албанците во Република Македонија кои во тој период биле во постојана опсервација, посебно албанските интелектуалци и смета дека Собранието треба да донесе акт за рехабилитација и обесштетување на овие лица.

Пратеникот Павле Трајанов смета дека потребно е да се направи прочистување на лустрацијата, како и рехабилитација на жртвите и помирување.

За член и претседател на Комисијата е предложен Томе Аџиев, кој и во изминатите три години беше прв лустратор, а за негов заменик е предложен Асан Лума. За членови на оваа комисија се предложени Новица Велјановски, Предраг Димитровски, Ѓорѓи Малковски, Вецко Здравевски, Ристана Лалчевска, Шпенд Винца, Даут Даути, Цветанка Соколова Младеновска и Марија Зафировска./крај/мф/ап