Македонија
Рилковски:Политички договор можно решение за настанатите проблеми од поклопувањето на роковите на изборите

Претседателот на Државната Изборна Комисија, Никола Рилковски смета дека е спорно поклопувањето на изборниот молк на претседателските избори со кампањата на предвремените парламентарни избори.
Проблемот е во тоа што кога на сила ќе биде денот на молк за претседателските избори, веќе во полн ек ќе тече кампањата за предвремените парламентарни избори, со што може да настане нарушување на изборниот молк кај изборот за претседател.
„Изборниот законик е тазе донесен, не предвидел течење на рокови последователно првин за претседателски, а по нив, не истовремено, и на предвремени парламентарни избори. Апелирам до Владата и до Министерството за правда, или до политичките партии во Парламентот, во овие два дена, додека не се самораспушти законодавниот дом, да иницираат законски измени или дополнување на Изборниот законик и да ги изгласаат измените за да се решат серијата дилеми кои ќе се појават поради преклопувањето на роковите за претседателските и за парламентарните избори. ДИК е тука да го спроведе Законикот и донесените измени”, апелираше претседателот на Државната изборна комисија Никола Рилкоски за политички компромис.
Според него ДИК не е таа која треба да ги реши пат позициите што ќе произлезат од преклопувањето на изборите, туку дека треба итно законодавецот да реагира, за да бидат изборите легални.
Рилковски, вели дека во моментов нема одговор како би се решила ваквата ситуација истакнувајќи дека комисијата немала состанок на кој би разговарала за овие новонастанати проблеми. Она што до сега е направено се само меѓусебни консултации по кои со своите колеги размислувале за една варијанта на решение на проблемот, а тоа е инволвираните политички страни да изнајдат меѓусебно политичко решение, односно договор со што би се надминала ваквата ситуација бидејќи сега нема веќе време за нови измени на изборниот законик.
Според Рилковски ваквото преклопување на роковите со себе повлекува уште еден проблем, а тоа е медиумската кампања која ќе тече за предвремените парламентарни избори, а од друга страна не смее да се објавуваат политичките активности, посебно политичките анкети и рејтинзи на партиите, бидејќи паралелно ќе биде предизборен молк за претседателските избори.
„Ние како ДИК се надеваме дека Министерството за правда, Владата и Собранието имаат предвид за настанатата ситуација бидејќи ние единствено што можеме да направиме е да се држиме до законот и да го спроведуваме.”, истакна Рилковски.
Тој признава дека доколку дојде до ситуација на кршење на законот можно е да биде покрената и иницијатива за поништување на изборите./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Најмногу туристи ни дојдоа од Турција во јуни

Според податоците од Државниот завод за статистика, во јуни годинава во земјата биле регистрирани вкупно 126.415 туристи, од кои 20,1 отсто се домашни, а 79,9 проценти странски туристи.
Од странските туристи кои ја посетиле земјата во јуни 2025 година, најмногу дошле од Турција – вкупно 34.366 лица, следат Србија со 8.897, Германија со 8.011 и Холандија со 3.604 туристи.
Во периодот јануари – јуни 2025 година, во однос на истиот период од претходната година, вкупниот број на туристите е зголемен за 13,5%, со намалување од 2,5% кај домашните туристи и зголемување од 19,7% кај странските туристи. Вкупниот број на ноќевања во првото полугодие се зголемил за 8,5%, при што кај домашните има мало намалување од 1,1%, а кај странските зголемување од 13,3%.
Македонија
Забрана за нови вработувања, поткуп, користење државен имот за кампања – ДКСК потсетува на забраните од денот на распишувањето на изборите

Државната комисија за спречување на корупцијата (ДКСК) информира дека во периодот од распишувањето на локалните избори во 2025 година до конституирањето на советите на општините и Градот Скопје важат специфични забрани и мерки.
Нови инвестиции и вонредни исплати од буџетот не смее да почнат или се извршат, освен ако претходно се обезбедени средства во согласност со законот.
Забрането е почнување постапки за нови вработувања или престанок на работен однос во државните и во јавните институции, освен во итни случаи.
Политичките партии и кандидатите не смее да користат противправни или анонимни извори на финансирање.
Државниот имот и буџетските средства не смее да се користат за изборна кампања или финансирање политички активности.
Поткупот на избирачи и давањето или ветувањето подарок за гласање е строго забрането.
Во периодот од 20 дена пред изборната кампања до нејзиното завршување не смее да се одржуваат јавни настани поврзани со изградба или пуштање во употреба објекти со државни средства.
Министерството за финансии е задолжено да ги објавува сите буџетски исплати во изборниот период, освен редовни плати, пензии и комунални трошоци.
Јавните фондови, претпријатијата и другите субјекти со државен капитал треба да достават податоци за моторните возила до ДКСК во рок од десет дена од распишувањето на изборите.
Користењето службени простории, опрема и возила за изборни активности е забрането.
Забранети се притисокот и заплашувањето гласачи и нивните блиски лица.
ДКСК ќе ја следи законитоста на изборниот процес и ќе презема мерки при сомневање за прекршување на законите.
Во изборниот период Комисијата нема надлежност да дава мислења по барања поврзани со постапките на државните и на локалните органи.
ДКСК ги повикува медиумите, здруженијата на граѓани и јавноста да пријавуваат прекршувања на забраните предвидени во законот.
Македонија
Стоматолошката комора тврди – нема неправилности, Министерството за здравство ја брани одлуката за преземање на лиценцирањето

Претседателот на Стоматолошката комора, Маријан Денковски, на прес-конференција изјави дека повеќекратните контролни надзори не откриле неправилности во работењето на Комората.
Тој ги демантира тврдењата дека Комората не постапила по насоките од министерот и најави консултации со поранешни претседатели за да го слушнат и нивното мислење.
„Од она што го знаеме досега, се работи за некои ‘незаконски’ постапки на Комората од 2016 година, па дури и порано, односно од 2006 година. Ќе се направи средба со Лекарската комора зашто, ако кај нас, во стоматологијата, ‘незаконска’ едукација вршеле речиси 15, како што беа наречени, нерегистрирани здруженија, во Лекарската комора, во системот на континуираната медицинска едукација учествуваат или учествувале над 80 такви здруженија, меѓу кои доминираат членки на Македонското лекарско друштво“ додаде Денковски.
Најави дека ќе се бара јавно извинување доколку се докаже отсуство на финансиски или други криминали.
Министерството за здравство одговори дека одлуката за преземање на лиценцирањето е донесена врз основа на подолготрајна анализа и извештаи од две формирани комисии, кои утврдиле неправилности и недостатоци во работењето на Комората.
„Потенцираме дека, по извршениот надзор на првата комисија, формирана во 2024 година, воопшто не е постапено по препораките, односно во целост се неточни тврдењата дека комисиите ‘немаат утврдени неправилности во кој било сегмент од работењето во Комората’, а втората комисија веќе дава јасни насоки до Министерството за здравство за утврдените неправилности, недостатоци и предлог за дејства што треба да се преземат“, велат од Министерството.
Министерството нагласи по одлука на Уставниот суд и врз основа на фактичките наоди, министерот донел одлука да ги преземе надлежностите за лиценцирање сè додека не се воспостави законит, транспарентен и професионален систем.
Министерството за здравство одлуката ја соопшти во саботата. Тогаш министерот Алиу информира дека надзорот на документите на Стоматолошката комора покажал сериозни пропусти, односно едукации преку нерегистрирани здруженија и сертификати, кои неправилно се користеле за продолжување на лиценците. Информира дека има и сомнеж за финансиска злоупотреба.