Македонија има младина која е способна и мотивирана за постигнување одлични резултати по високи светски стандарди, истакна министерот за одбрана Талат Џафери на свеченоста по повод промовирањето на четворицата кадети од првата класа слушатели во Центарот за обука на пилоти во офицерски чин поручник.

Воедно Џафери истакна дека преку оваа свеченост каде е промовирана и првата жена-пилот во редовите на Армијата на Република Македонија може да се увиди дека и во пракса Министерството за одбрана ја спроведува резолуцијата 1325 на ООН по однос на родовата еднаквост.

На свеченоста на која присуствуваа и заменик-началникот на ГШ на АРМ, генерал-потполковник Насер Сејдини, како и државниот секретар во министерството, Сашо Стефаноски, министерот Џафери се осврна и на значењето на тукушто отворениот објект на Центарот во кој се поставени и новите симулатори од светски ранг.

„Пред неколку денови, во употреба го предадовме новиот мултифункционален објект на Центарот за обука на пилоти во кој е вграден најсовремен софистициран автоматизиран систем и е опремен со симулатори за летање со хеликоптерите Ми-17 и Ми-24″, рече министерот на свеченоста. Летањето на симулатори, додаде тој, претставува нова димензија во обуката на пилотите и обезбедува одржување на потребниот тренаж на пилотите.

На свеченоста се обрати и деканот на Воената академија, полковник Орце Поповски, кој им честиташе на офицерите-пилоти, а воедно се осврна и на местото и значењето на Воената академија во образовниот систем на Република Македонија, но и пошироко, во регионални рамки.

„Ве обучивме за секоја мисија со која може да се соочи секој пилот на хеликоптер и која ќе претставува предизвик во вашата кариера. Ви ги дадовме најважните и најефикасните алатки со цел да ги изградите и да ги поддржите сите ваши идни летачки активности. Ние се гордееме со вас”, изјави Директорот на Центарот за обука на пилоти, Јаари Шрага.

Џафери исто така информираше дека поради несоодветствување на планираните средства со понудите за започнување на генерален ремонт на хеликоптери, министерството за одбрана не било во можност да ја реализира постапката во 2013 година.

Како што додаде тој, истата е планирана и за оваа година, со таа напомена дека последните понуди имплицираат на успешна реализација на соодветната процедура, со што во следните 4 -5 месеци ќе може да се направи избор.

Во рамки на договорот на Министерството за одбрана и „Елбит системи” потребно е да се обучат 52 пилоти за потребите на воздухопловната бригада. Втората група на пилоти на хеликоптери за АРМ веќе ја заврши првата фаза од обуката, а наскоро се очекува да започне обуката на третата група и на кандидатите за пилоти./крај/мф/бс