Единаесет нови случаи на заболени од ХИВ се регистрирани за само три месеци, во периодот од јануари до средината на март годинава.

Сите од нив се мажи, а дури осуммина се заразиле преку секс со други мажи, додека тројца од нив го добиле вирусот преку незаштитен сексуален однос со жени. Пациентите се на возраст од 20 до 29 години, а најмладиот од нив е тинејџер, објави Дневник, врз основа на резултатите од тестирање на над 200 лица со ризично однесување што го спроведоа Институтот за јавно здравје, Министерството за здравство и невладините организации ХОПС, ХЕРА и Егал.

Началникот на одделението за сексуално преносливи болести во ИЈЗ д-р Жарко Караџоски вели дека во последните години се зголемува бројката на мажи кои се заразиле со вирусот преку секс со мажи, односно за 10 години нивниот број е зголемен од 10 на 51.

Исто така, пишува Дневник, зголемен е и бројот на нови случаи на ХИВ/СИДА. Лани за 12 месеци имало 25 регистрирани случаи, оваа година за само 2,5 месеци има 11 новопријавени.

„Бидејќи на никого на чело не му пишува дека е заразен со ХИВ, за да се заштитиме, во секој треба да се сомневаме дека можеби е носител на вирусот, па задолжително да се практикува сексуален однос со кондом, а интравенозните зависници од дроги да користат стерилен прибор”, предупредува Караџовски.

Според последните податоци на ИЈЗ, заклучно со 29 ноември 2013 година, вкупниот број на лица кои живеат со ХИВ/СИДА во Македонија е 194. Од нив, 143 лица се болни од СИДА, а 51 се ХИВ позитивни. Вкупниот број на умрени лица од СИДА е 71.

Минатата година се регистрирани 25 лица заразени (23 мажи, 2 жени) со овој вирус и два смртни случаи од СИДА.

Кај најголем број од случаите, 14, вирусот е пренесен при сексуален однос на маж со маж, а во еден случај вирусот е пренесен д мајка на плод. Според возраста, најголем број заразени се на возраст од 20 – 29 години.крај/мф/сд