Македонија
Одбележан 7-ми мај – Денот на воената полиција, полицијата и безбедноста

Во касарната ,,Илинден” во Скопје, се одржа свеченост по повод 7-ми мај денот на баталјонот на Воена полиција (бВП) и денот на полицијата и безбедноста.
На свеченоста присуствуваа заменикот на министерот за одбрана, Емил Димитриев, заменикот на началникот на ГШ на АРМ, генерал-потполковник Насер Сејдини, државниот секретар во Министерството за одбрана Сашо Стефаноски, командантот на Здружената оперативна команда (ЗОК), генерал-мајор Методија Величковски и други високи гости од МО и ГШ на АРМ.
Заменикот на министерот за одбрана Димитриев во обраќањето пред присутните истакна дека баталјонот на Воена полиција паралелно со развојот на АРМ во изминатите 22 години, секојдневно остварувајќи ги своите основни задачи како што се обезбедување на објектите на Министерството за одбрана и Генералштабот на АРМ, како и командите на единиците на АРМ, обезбедување на личности и делегации, контрола на воениот сообраќај и откривање, пронаоѓање и спроведување на сторители на кривични дела во одбраната, се оформуваше покажувајќи дека мотото ,,Секогаш подготвени” значи дека доверените задачи ќе бидат квалитетно, професионално и пред се безбедно извршени.
Димитриев пред стројот на баталјонот на Воена полиција го нагласи и учеството на припадниците на овој баталјон во наменските сили ,,Феникс” во мисијата ИСАФ во Авганистан, како уште една потврда на фактот дека за влез во единицата треба да се исполнат посебните критериуми за селекција, слични на оние пропишани за специјалните единици.
Командантот на баталјонот на Воена полиција, потполковник Роберт Тасески истакна дека единицата со која командува, како модерна и мобилна единица во рамките на ОСС Концептот учествува со една воено-полициска чета и вод кој се сертифицирани, при што потенцираше дека припадниците на баталјонот докажале висока подготвеност за извршување задачи, рамноправно со партнерите и НАТО.
На свеченоста беше прочитана честитка од Началникот на ГШ на АРМ до припадниците на баталјонот на воена полиција, како и стимулативни мерки по повод празникот. Припадниците на баталјонот на Воена полиција деновиве достојно го одбележаа празникот со голем број на спортски натпревари, крводарителна акција и хуманирна акција на донирање на прехрамбени продукти во ЈЗУ за деца со белодробни заболувања ,,Козле” во Скопје.
Денот на полицијата и безбедноста, во АРМ го одбележаа и припадниците на службата на военото разузнување и безбедност, кои се наоѓаат во секциите Ј-2 и С-2 во структурата на командите и штабовите на АРМ./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЛДП: Банкарските такси паѓаат под наш притисок, но нема да запреме со борбата против неправедните провизии

Граѓаните преку Либерално-демократската партија (ЛДП) го извојуваа првиот чекор – намалување на тарифниците за банкарски услуги, што произлегува како директен резултат од спроведената кампања „Твоја сметка – твои пари“ и јавниот притисок во интерес на граѓаните, велат од партијата.
Оттука сметаат дека ова е важен и исправен чекор напред, кој покажува дека кога институциите имаат слух, а политиката се води во служба на граѓанинот, резултатите не изостануваат.
„Го охрабруваме гувернерот на Народната банка да продолжи со реформскиот курс и уште похрабро да застане зад иницијативите за укинување на низа неосновани банкарски надоместоци и провизии што постојат само во нашата земја, а се непознати во модерните европски банкарски системи. Македонските граѓани и понатаму плаќаат провизии за затворање на сметки, за проверка на состојба, за повлекување пари од друг банкомат, за онлајн плаќања и електронски пристап – трошоци кои во најголем дел од земјите членки на Европската Унија се укинати или се сведени на минимум. Време е оваа неправда да престане“, велат либералите.
Во таа насока, ЛДП три пати поднесе измени на Законот за платежни услуги и платни системи до Собранието. Предложените измени предвидуваат укинување на банкарски надоместоци за кои нема никаква реална основа и кои само дополнително го оптоваруваат животниот стандард на граѓаните. Очекуваат сите пратеници, без оглед на политичката припадност, конечно да застанат зад граѓанскиот интерес и да дадат поддршка на измените.
Македонија
Гори во Радовиш, Берово, Прилеп – активни седум пожари, три под контрола

Во текот на измнинатото деноноќие на територијата на државата евидентирани се вкупно 27 пожари на отворен простор. Од нив, седум се активни, три се под контрола, а седумнаесет се изгаснати.
Активни пожари има на неколку локации. Во општините Василево, Радовиш и Берово, во селото Нивичино, на планините Голем Готен и на Малешевските Планини гори нискостеблеста шума, смрека, грмушки и ниска вегетација. Во општина Прилеп, кај селото Бешиште, во местото наречено Бешишки Рид, пожарот се шири кон селото Градешница (општина Новаци) и кон границата со Република Грција, каде што не се интервенира поради детонации. Активен пожар има и меѓу селата Царевиќ, Смолани, Радобил и Дрен во општина Прилеп, како и селата Галиште и Трстеник во општина Кавадарци, каде што гори мешана шума и ниска вегетација. Во општина Македонски Брод гори деградирана дабова шума меѓу селата Црешево, Локвица и Крапа. Во селото Ќосевица, општина Македонска Каменица, активен е пожар во борова шума. Пожар е активен и во селото Ореше во општина Чашка, каде што гори букова шума и ниска вегетација, како и во селото Горно Црско во општина Кичево, каде што е зафатена ниска вегетација и ниска шума.
Под контрола се три пожари: во селото Грешница во општина Македонски Брод, каде што гори мешана шума и сува трева, потоа меѓу селата Драгоево и Селце во општина Штип, каде што е зафатена нискостеблеста шума, прнар и сува трева, како и во селото Јунузлија во општина Карбинци, каде што гори шума.
Изгаснати се вкупно 17 пожари на разни локации. Во општина Битола, на улицата Игњат Атанасовски, горела ниска вегетација. Во општина Василево, кај селото Босилово, бил зафатен пожар на депонија. Во селото Умин Дол во општина Куманово горела ниска вегетација, исто како и во населбата Бедиње. Во село Горно Лакочереј, општина Охрид, горело стрниште, а покрај автопатот Тетово – Скопје, во општина Тетово, исто така била зафатена ниска вегетација. Пожар имало и во селото Дебреше, општина Гостивар, во селото Годивје, општина Кривогаштани, каде што горела ниска вегетација и плевна, и во селото Долна Бела Црква, општина Ресен, на ѓубриште. Во општина Босилово, во селата Моносипитово и Банско, гореле депонии. Пожарот што почнал во селата Облавце, Бељаковце, Довезенце и Руѓинце во општините Старо Нагоричане и во Куманово се проширил и кон селата Димонце и Коњух во општина Кратово, каде што биле загрозени куќи и помошни објекти. Во село Нерав, општина Крива Паланка, горела висока борова шума. Во општина Илинден, меѓу селата Мршевци и Бучинци, горело стрниште, а во Катланово и село Чифлик, општина Петровец, била зафатена ниска вегетација, грмушки и дабова шума. Во општина Шуто Оризари, на улицата Брсјачка Буна, горело ѓубриште. Во општина Желино, меѓу селата Церово и Групчин, горела нискостеблеста и деградирана шума, а во селото Долно Перово, општина Ресен, биле зафатени елови дрва, врби, трска и сува трева.
Македонија
Кривична против директорка во Виница, си ја вработила ќерката во истото училиште иако немала соодветно образование

Полицијата поднесе кривична пријава против Г. С. (45) од Виница, директорка во основно училиште во овој град, поради несовесно работење во службата.
„На 27 јануари пријавената склучила договор за вработување со својата ќерка С. С., иако немала соодветно образование, на работно место предметен наставник по математика во основно училиште“, соопшти МВР.
Од тука велат дека со тоа му била нанесена штета на буџетот на училиштето на име исплата на плати во износ од 245.666 денари.