Пушењето е водечка причина за смртност не само во Македонија, туку и во светот, велат од канцеларијата на Светската здравствена организација во Македонија. Исто така тутунот е главниот фактор кој придонесува за незаразните болести како што се ракот на белите дробови и срцевите заболувања.

Во Македонија околу 30 проценти од населението спаѓа во категоријата пушачи, а студијата изработена од Институтот за социјална медицина на труд при Медицинскиот факултет во Скопје, чии резултати беа соопштени во петок по повод Светскиот ден против пушењето 31-ви мај, покажа дека секој трет лекар во Македонија е пушач. Од 1999 година, меѓутоа, бројот на пушачи меѓу лекарите се намалил за 30 проценти.

Студијата покажа дека ниту еден од лекарите не потврдил дека употребува никотинска замена со цел да се одвикне од цигари, 35 проценти од лекарите изјавиле дека лекарите-пушачи помалку ги советуваат своите пациенти да се одвикнат од пушење, а речиси 72 проценти од нив сметаат дека пациентите полесно ќе се одвикнат од пушење доколку ги советува лекарот.

Заклучок од ваквите резултати е дека треба да се засили едукацијата на Медицинскиот факултет во делот на превенција на пушењето.

Снежана Чичевалиева, шеф на Канцеларијата на Светската здравствена организација истакна дека сите мора да сфатиме дека пушењето е водечка причина за смртност, не само во светот, туку и кај нас.

Мотото на Денот против пушењето оваа година е „„Зголемете ги даноците, намалете ги смртните случаи и болестите”.

Позитивен пример за ефикасноста на зголемувањето на даноците врз намалување на пушењето е Турција која има долга традиција за пушење. Во оваа земја зголемувањето на акцизите и спроведувањето на другите политики, како што се забраната за пушење во затворени простории и рекламирање на тутунот, довеле до релативно опаѓање на пушењето од 13 проценти помеѓу 2008 и 2012 година.

Според проценките на СЗО, ако сите земји го зголемат данокот на цигарите за 50 проценти ќе има 49 милиони пушачи помалку, а ќе се избегнат најмалку 11 милиони смртни случаи предизвикани од пушењето. Во просек зголемувањето на даноците на тутун и зголемување на цената за 10 проценти ќе ја намали употребата на тутунот за четири проценти во земји со високи примања за околу пет проценти во земјите со низок и среден приход. СЗО препорачува даночниот удел да биде најмалку 75 проценти од малопродажната цена од најпопуларните марки на цигари. Во 53 земји во европскиот регион на СЗО, 26 имаат веќе таков закон. Заради тоа Европа е глобален лидер во оданочување на тутунот и цените, во споредба со другите региони на организацијата.

Глобална проценка на СЗО е дека доколку даноците се зголемат за 50 проценти по кутија цигари, владите би заработиле дополнителни 101 милијарда американски долари.крај/мф/сд