Привлекување на нови инвестиции и отворање на нови работни места, потоа максимални напори и посветеност за остварување на евро и евроатланските интеграции и натамошно зајакнување на меѓуетничките односи во земјата – ова се приоритетите за премиерот Никола Груевски и неговата влада во новиот мандат, потенцира тој во интервју за МИА.

Груевски во интервјуто се осврнува и со ситуацијата со СДСМ и невлегувањето во парламентот, потенцирајќи дека тоа ќе биде лошо за целата земја.

„На пример, инатењето со невлегувањето во Парламентот не носи во губење на препораката од Европската Комисија, и тоа ќе биде лошо за сите, но изгледа Заев се уште верува дека на тој начин ќе го сврти јавното мислење кон него, и во него ќе видат спасител кој ќе не врати на висинскиот пат. Со тоа уште еднаш покажува колку многу го потценува капацитетот на граѓаните, што пак најмногу говори за него лично. Од друга страна, неговите постапки толку многу со радост ги дочекуваат оние кои несакаат да ја видат земјата да напредува, што понекогаш човек на се помислува. Но тоа е друга тема. Она што е важно е дека народот покажа вистинска зрелост. Не само што не подлегна на манипулациите на клеветите на Заев, туку го казни со еден од најсилните порази на СДСМ со над 200 илјади гласа разлика. Македонија не е истата од деведесеттите”, вели Груевски.

Во однос на обвинувањата за криминал од страна на СДСМ за продажбата на Македонска банка, Груевски дециден дека обвинувањата се невистинити.

„Јас никогаш не сум земал еден и пол милион евра кеш, ниту на било кој друг начин, ниту пак помала или поголема сума за продажбата на Македонска банка. Од тука сите други обвинувања кои произлегуваат од тоа се невистинити. Иако клеветата од Заев е за непостоечки акт постар од 10 години, јас за секој случај одлучив да поднесам тужба за клевета за да со сигурност се расчисти оваа валкана манипулација и да добие судска разврска, а човекот кој видовме како во минатото се заборавил во делење тендери и јавни пари на сите роднини и партиски функционери, и кој пред 5 години се согласи за спас од обвинение за криминал тежок 8 милиони евра преку аболиција од неговиот ментор, тој истиот ќе треба да се соочи со вистината кога ќе треба да докаже дека јас сум ги земал тие еден и пол милион евра пред повеќе од 10 години за кои тој ме клевети”, вели македонскиот премиер.

„Самиот факт што сега пред да заврши судската разврска, СДСМ и нивните контролирани медиуми нервозно секој ден се трудат да ја експонираат темата, покажува колку е ниска нивната самодоверба во овој случај. Тој што е сигурен во себе не џавка, туку мирно го чека крајот на судската разврска. Но ќе дојде и тој ден, кога правдата и вистината ќе излезат на површина. Јасно е дека Заев негирајќи го судскиот систем уште отсега спрема терен и судската одлука да не ја признае. Мислам дека се работи за недоволно зрел човек, во најмала рака политички недоволно зрел. Некои негови постапки наликуваат на детско лутење кога ќе загуби во некоја детска игра. Но политиката не е детска игра и не е место каде некој треба да го чекаме да досозрее, пред се политички. Неговите постапки иако од позиција на претседател на најголемата опозициска партија и носат сериозна штета на државата, но и на сите нејзини граѓани вклучувајќи ги и членовите на СДСМ”, додава Груевски.

Запрашан за тврдењата на СДСМ дека изборите беа нерегуларни и недемократски и бојкотот на СДСМ, Груевски вели дека фактот што најголемата опозициска партија загубила со 200 илјади гласа разлика, и немало ниту една формална жалба до Државната изборна комисија, говори сам за себе.

„Прво, ќе повторам и потсетам дека СДСМ загуби со над 200 илјади гласа на овие избори и немаше ниту една формална жалба до ДИК за овие избори од причина што реално немаше материјал на кој би се жалеле. Најавуваа и некакви докази дека ќе приложеле во јавноста за наводни нерегуларности, но ниту докази, ниту снимки, ништо конкретно не видовме. Политиката на бојкот е продолжување на политиката на Црвенковски, тоа е старо и веќе видено. Со таа тврдоглавост се прави штета врз угледот на државата, се прави штета врз работата на Собранието, но најголем губитник е самиот СДСМ кој наместо да се помири со размислувањето на граѓаните, тие решија да одат наспроти нивната волја. За тоа дали овие избори се регуларни и демократски не мора да ја слушнете мојата оценка, туку пред се оценката на ЕУ, САД и ОБСЕ/ОДИХР кој рекоа дека изборите се ефикасно спроведени. Истиот СДСМ кога во 2004-та година победи Бранко на претседателските избори, иако ОБСЕ/ОДИХР излегоа со извештај во кој беа нотирани масовни полнења на гласачки кутии, замислете во извештај да ви пишува масовни полнења кутии на изборите, понатаму вооружени лица во близина на гласачки места, физички инциденти, непрочистен избирачки список, семејно гласање и ред други тешки пропусти и недостатоци, нешто што на овие избори ништо од ова не се случи, тогаш СДСМ излезе и ги призна за фер овие избори. Тоа е двојниот стандард и аршин на СДСМ. А што се однесува до медиумите, паметам тогаш во тие времиња честопати имавме проблем да воопшто некоја тв камера ни дојде на организирана прес-конференција”, изјави Груевски.

Груевски исто така потсетува дека пред овие избори заеднички со СДСМ биле усогласени измените и подобрувањата на изборниот закон, а заеднички биле изгласани и во Парламентот, а најголем дел од измените се базирале и на препораките на ОБСЕ/ОДИХР./крај/мф/бс