Граѓаните се оние кои на 5-ти Април ќе го изберат Претседателот и сметам дека секој што ќе ја добие поддршката на македонските граѓани ја заслужува

Граѓаните се оние кои на 5-ти Април ќе го изберат Претседателот и сметам дека секој што ќе ја добие поддршката на македонските граѓани ја заслужува и соработката од сите други институции.

Ова за Радио Слободна Европа го изјави министерот за надворешни работи Антонио Милошоски, одговарајќи на прашањето дали владата ќе соработува со кандидатот на СДСМ Љубомир Фрчкоски, доколку победи на изборите.

Шефот на македонската дипломатија го повтори ставот на премиерот Никола Груевски дека конечниот збор во спорот околу името со Грција треба да го дадат граѓаните, истакнувајќи дека е невкусно да се лицитира со додавки на името.

На прашањето дали владата ќе се согласи со некоја додавка, на пример Северна Република Македонија, што би значело членство во НАТО и датум за преговори во ЕУ, доколку одговорноста би ја презел Фрчкоски, Милошоски рече дека треба да се биде принципиелен во однос на спорот со Грција.

“Ова е национално прашање во Македонија и ние цениме дека главниот збор за конечната одлука за каков било можен компромис треба да биде верификуван и потврден од граѓаните на Македонија на референдум. Било какви додавки или придавки, не е вкусно да се лицитира со нив, бидејќи не носи корист”, изјави Милошоски.

Тој наведе дека повеќе влади на Македонија и на Грција работат врз ова прашање многу години, но се покажало дека не е така едноставно да се стигне до тој компромис.

Сметам дека би било реално да се каже дека позицијата на Грција да го негира идентитетот на македонскиот народ ги отежнува преговорите за постигнување компромис. Мислам дека стануваме посвесни, барем тие што сме директно вклучени, дека сме сведоци на една скриена агенда да се подрие идентитетот на нацијата и на јазикот на Македонија, рече Милошоски во интервјуто за Радио Слободна Европа. /крај/ап