Полициска злоупотреба се уште постои во Македонија, меѓутоа се забележува тенденција на нејзино намалување

Полициска злоупотреба се уште постои во Македонија, меѓутоа се забележува тенденција на нејзино намалување.Ова се наведува во извештајот за заштита на правата на човекот при полициска злоупотреба или тортура „Пристап до правдата “ за 2008 година, изготвен од невладините организации „Центар за демократски развој“ од Тетово, „Форум за правата на Ромите – Арка“ од Куманово, „Центар за граѓанска иницијатива“ од Прилеп, „Избор“ од Струмица и Коалицијата „Сите за правично судење“.Според извештајот, што беше објавен денеска, бројот на евидентирани случаи на злоупотреба од страна на полициски службени лица за 2008 изнесува 37, што претставува намалување од 16% во однос во 2007 година.Најголем број случаи на полициска злоупотреба во 2008 година биле регистрирани во регионот на југозападна Македонија, а според истата евиденција најмал број регистрирани случаи се забележува во регионот што ги опфаќа Скопје и Велес.Граѓаните најчесто се жалат на прекумерна употреба на сила и нанесување телесни повреди, што за 2008 година е 38% од вкупниот број регистрирани случаи на граѓаните кои сметаат дека се жртви на полициска злоупотребаКако најчести жртви по националност се пријавуваат Македонците 61%, Албанците 21 % и Ромите 18 %.НВО кои го изготвија извештајот потенцираат дека е загрижувачка тенденцијата на спектакуларни апсења, со кои се повредува правото на приватност и на презумпција на невиност.Најмногу поплаки во 2008 година, процентуално имало за униформирани полициски службеници – 39%, инспектори 29%, неуниформирани 16%. Позитивно се намалува бројот на поплаки за командири на полициски станици, сообраќајна полиција и посебната мобилна единица Алфи.Претставниците од невладините организации посочија дека минатата година, во рамки на Проектот за поддршка на човековите права биле подготвени и поднесени 31 претставка до Секторот за внатрешна контрола и професионални стандарди на МВР за евидентираните 37 случаи. Секторот за внатрешна контрола за поднесени 31 претставка доставил 29 одговори.Во 76 % од одговорите кои ги доставил Секторот за внатрешна контрола е констатирано дека претставките се неосновани и оти недостасува правна поука, како и можност за второстепено постапување по поднесената претставка.Минатата година се зголемила и соработката на граѓанскиот сектор со Народниот правобранител, се наведува во извештајот.Според извештајот, во Македонија постои недоверба кон државните институции и распространето е мислењето дека постои т.н. полициска субкултура, како брана пред можноста случаите на полициски злоупотреби да бидат целосно истражени, документирани и осудени.Невладините организации го имплементираат Проектот за поддршка на човековите права, поддржан од Фондацијата Институт отворено општество – Македонија и Фондот за жртви од тортура при Обединетите нации. Проектот овозможува бесплатна правна помош на граѓаните кои сметаат дека се жртви од полициска злоупотреба или тортура./крај/амп/ил