Македонија
Шефер во проштална посета на Македонија
Генералниот секретар на НАТО во заминување Јаап де Хоп Шефер денеска треба да оствари проштална посета на Македонија
Генералниот секретар на НАТО во заминување Јаап де Хоп Шефер денеска треба да оствари проштална посета на Македонија.
Според агендата, првиот човек на НАТО ќе биде примен од претседателот во заминување Бранко Црвенковски, од новоизбраниот претседател Ѓорге Иванов и од премиерот Никола Груевски.
Шефер ќе има средби и со министрите за надворешни работи и за одбрана, Антонио Милошоски и Зоран Коњановски.
На средбите, како што е соопштено во Скопје, „ќе се разменат мислења за актуелните прашања поврзани со членството на Македонија во НАТО“.
„Македонија е единствена земја партнер на НАТО, која ќе биде домаќин на Шефер, што е негова лична заложба, како дел од прошталните посети пред неговото заминување од функција генерален секретар“, соопшти Министерството за надворешни работи.
Во рамки на посетата, на Шефер ќе му биде врачена „благодарница и подарок за долгогодишната поддршка и партнерството од страна на НАТО на евроатланската интеграција на Македонија“, на церемонија во организација на Евро-Атлантскиот Совет на Македонија.
Шефер треба да пристигне во Македонија од Тирана, каде претпладнево треба да има средби со албанскиот државен врв.
Тој наскоро заминува од местото прв човек на НАТО, а нов генерален секретар од први август ќе биде поранешниот дански премиер Андерс Фог Расмусен./крај/с/ег/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бесплатни уролошки прегледи денес во амбулантата на Специјализираната болница за геријатриска и палијативна медицина
По повод Месецот на машкото здравје – Мовембер, во амбулантата на Специјализираната болница за геријатриска и палијативна медицина „13 Ноември” – Скопје денеска со почеток во 10 часот ќе се вршат бесплатни уролошки прегледи, како и ехо прегледи на бубрези и простата.
Целта е подигнување на свесноста за значењето на навремената грижа за машкото здравје. Ова е одлична можност за навремена проверка, превенција и грижа за здравјето, информира болницата „13 Ноември” – Скопје.
Уролошки прегледи ќе врши Дарко Марковски, уролог од ГОБ „8-ми Септември“, а ехо на бубрези и простата докторките Марика Филипова и Марија Сековска – специјалисти интернисти во Специјализирана болница за геријатриска и палијативна медицина „13 Ноември“ .
Македонија
Поради сообраќајка се пренасочува сообраќајот на магистралниот пат Куманово-Крива Паланка
Сообраќајот на магистралниот пат Куманово-Крива Паланка од 9:15 часот се одвива со наизменично пропуштање на возилата, информира АМСМ.
Петходно од АМСМ соопштија дека поради случена сообраќајна незгода од 8:30 часот во целосен прекин е сообраќајот на магистралниот пат Куманово-Крива Паланка.
Македонија
Студено утро, во Маврово снег и температури под нулата
Најмногу дожд 40 литри на квадратен метар во изминатите 24 часа наврна во Демир Капија, по што следат Радовиш и Пожар со 37, Гевгелија со 35 и Штип со 28. Деветнаесет литри на квадратен метар наврнаа во Струмица, 16 во Виница, 15 во Куманово, 13 во Кавадарци и Крива Паланка, 12 во Попова Шапка, 11 во Претор, 10 во Маврови Анови и Скопје-Петровец, 8 во Берово, 7 во Лазарополе, 6 во Велес, 5 во Пожаране, 4 во Битола, Тетово, Крушево и Прилеп и по еден во Скопје – Зајчев Рид и Тополчани.
Утринава најстудено беше во Маврови Анови, Лазарополе и Пожар каде е измерена температура од -1 степен Целзиусов, во Пожаране и Крушево, 1 во Крива Паланка, 2 во Претор, Охрид, Тополчани, Куманово и Виница, 3 во Тетово, Штип, Прилеп, Берово и Скопје – Зајчев Рид, 4 во Битола, Велес, Кавадарци, Струмица, Демир Капија и Скопје-Петровец, а најтопло беше во Гевгелија каде се измерени 5 степени Целзиусови.
Времето денеска ќе биде променливо облачно со сончеви периоди. На планините и на повисоките места ќе провејува слаб снег. Ќе дува слаб до умерен ветер од северозападен правец. Максималната температура ќе биде во интервал од 5 до 11 степени Целзиусови.
И во Скопје ќе биде променливо облачно со сончеви периоди. Ќе дува умерен северен ветер. Максималната температура ќе достигне до 8 степени Цезлиусови.

