Полицијата вчера го приведе турскиот државјанин А.Х. (35) поради основано сомневање дека тој е нарачател на хероинот запленет ден претходно

Полицијата вчера го приведе турскиот државјанин А.Х. (35) поради основано сомневање дека тој е нарачател на хероинот запленет ден претходно.

Ова денеска го соопшти Министерството за внатрешни работи, додавајќи дека во рамките на заедничката операција „Босфор“ на македонската и турската полиција со посредство на СЕКИ Центарот, биле добиени сознанија дека турчинот А.Х., кој се крие на Косово е нарачател на дрогата.

Во текот на вчерашниот ден на еден од двајцата осомничени македонски државјани му било дозволено да се сретне со нарачателот во кафуле на плоштадот Македонија, а турскиот државјанин не бил запрен на граничниот премин „Блаце“ кон Косово, односно граничната полиција му овозможи да влезе во Р. Македонија.

Под засилен полициски надзор, Турчинот се упатил кон Скопје појавувајќи се на договореното место за да се усогласат околу подигнувањето и натамошниот транспорт на хероинот, но во тие моменти А.Х. е приведен од страна на припадници на специјалните единици

Турскиот државјанин, по кој е распишана и меѓународна потерница, успеал да и побегне на турската полиција при реализација на поголема операција за шверц на дрога и оружје, заедно со завчера приведените македонски државјани вчера попладне беше изведен пред надлежен Истражен судија.

На сите тројца им е изречена мерка притвор во времетраење од 30 дена и истите со засилено обезбедување се префрлени во Истражниот затвор – Скопје. Во соработка помеѓу македонските и турските правосудни органи ќе се одлучува кој и како ќе постапува натаму со турскиот државјанин.

Во меѓународната операција „Босфор” за откривање и пресекување на интернационален канал за недозволена трговија со наркотици од блискиот исток кон западноевропските земји, беа запленети околу 9 килограми и 330 грама чист хероин.

Според досегашните сознанија, меѓународната група во која биле вклучени и македонски државјани, изминативе години успеала во западноевропските земји да прокриумчари дрога вредна повеќе милиони евра. /крај/со/мп