Македонското Собрание, и покрај најавите, денеска не ја стави на дневен ред предлог државната стратегија за решавање на разликите со Грција

Македонското Собрание, и покрај најавите, денеска не ја стави на дневен ред предлог државната стратегија за решавање на разликите со Грција околу името.

Ова уследи откако парламентарните партии по целодневни консултации не успеаја да ги усогласат ставовите по текстот на документот, поднесен од либералот Стојан Андов.

Повод за консултациите беа амандманите поднесени од крајот на минатата недела од ВМРО – ДПМНЕ, кои денеска биле прифатени, но усогласувањето дополнително го испроблематизирале амандмани поднесени од Нова Демократија. (НД)

Со интервенциите во текстот на стратегијата, НД бара да се гарантира мултиетничкиот карактер на државата.

Опозицијата oceni дека нема потреба од дополните гаранции за мултиетничкиот карактер во разговорите со Грција за решавање на разликите околу името и оти станува збор за тактика на власта.

„СДСМ, иако беше договорено стратегијата да оди без амандмани, ги прифати амандманите на ВМРО – ДПМНЕ за да ги заштити националните интереси.. Но, на големо изненадување денеска амандмани поднесе НД, најпосакуваниот партнер на ВМРО ДПМНЕ. Сега се отвора дилемата дали ова не е смислено сценарио за одолговлекување на решение на спорот за името,“, посочија од СДСМ.

Подносителот на предлог државната стратегија Стојан Андов изјави дека партиите покажале „несериозен однос кон едно важно прашање од национален интерес“.

Владеачката ВМРО ДПМНЕ ги отфрли обвинувањата дека тактизира и изрази надеж дека преговорите за усогласување на текстот на државната стратегија ќе продолжат „во вторник или во наредните неколку дена“./крај/ег/