Македонската полиција во првата половина од годинава запленила разни дроги, чија вкупна вредност на домашниот нарко-пазар се проценува на околу пет

Македонската полиција во првата половина од годинава запленила разни дроги, чија вкупна вредност на домашниот нарко-пазар се проценува на околу пет милиони евра.

Ова се наведува во информацијата на Министерството за внатрешни работи за состојбите со недозволената трговија и злоупотреба на дрога во шестте месеци од годинава, додавајќи дека во истиот период лани била запленета дрога со вредност од половина милион евра.

МВР нагласува дека годинава е забележано зголемување на откривањето за 34,8 насто и биле запленети повеќе од половина тон марихуана, над 82 килограми хероин, 2.106 таблети екстази и помали количества кокаин, хашиш, метадон и мешавина од парацетамол и кофеин.

Во шестте месеци од годинава се пресечени три меѓународни канали за шверц на дрога, а во целата 2008 биле откриени четири канали.

Првиот меѓународен канал е пресечен во април на граничниот премин Деве Баир, вториот во Неготино, а третиот во Скопје. Во овие акции се запленети над 78 килограми хероин.

Во првата половина од годинава се откриени 232 кривични дела од областа на недозволената трговија со дроги, за што се пријавени над 250 сторители. Најголем дел од сторителите се на возраст од 18 до 40 години, додека седуммина се малолетници.

Најголем број од делата 67 се откриени во Скопје, а најголемата заплена на дрога од 539 килограми марихуана е извршена во Тетово, која била одгледана во Македонија. Тогаш биле запленети и семенски материјал и повеќе стебла канабис сатива.

Во текот на првите шест месеци годинава во Македонија се регистрирани 124 нови корисници на дрога, со што нивниот вкупен број изнесува 8.743. /крај/со/мп