Владата на последната седница го номинираше Владимир Ристовски за нов амбасадор на Македонија при Постојаната Мисија на Советот на Европа во Стразбур

Владата на последната седница го номинираше Владимир Ристовски за нов амбасадор на Македонија при Постојаната Мисија на Советот на Европа во Стразбур.

Ова денеска за Макфакс го изјави портпаролот на Министерството за надворешни работи Петар Чулев, додавајќи дека Ристовски како досегашен шеф на Канцеларијата на Советот на Европа во главниот град на Молдова Кишињев има големо искуство со оваа европска организација.

„Неговиот минат труд е од исклучителна важност со оглед на тоа што Република Македонија од мај до ноември идната година ќе биде претседавач со Комитетот на министри на Советот на Европа“, рече Чулев.

Инаку во Владата се вршат интензивни консултации за пополнување на испразнетите десетина амбасадорски места.

Неофицијално дознаваме дека поранешниот амбасадор во Вашингтон Никола Димитров, веројатно ќе биде идниот амбасадор на Македонија во Кралството Холандија, а истовремено ќе ја извршува и функцијата ко-застапник на државата во случајот против Грција пред Меѓународниот суд на правдата во Хаг.

Речиси е извесно дека сегашниот раководител на секторот за конзуларни работи во Министерството за надворешни работи, Рамадан Назифи, ќе биде нов амбасадор во Швајцарија. Во својата дипломатска кариера работел во неколку македонски дипломатско-конзуларни претставништва во странство, од кои последно во амбасадата на Македонија во Берлин.

Испразнети чекаат амбасадорските места во Софија, Доха, Варшава, Канбера, Отава, Рим, Ватикан, како и во мисијата на ОБСЕ, додека во наредните месеци им истекува мандатот на амбасадорите во Берлин, Париз и Будимпешта./крај/мп