Македонија
Б.Димитров – Тивка дипломатија и притисок за ослободување на Спаска

За ослободувањето на Спаска Митрова се водеше тивка дипломатија во рамки на која беше вршен сериозен притисок од бугарскиот премиер врз неговиот…
За ослободувањето на Спаска Митрова се водеше тивка дипломатија во рамки на која беше вршен сериозен притисок од бугарскиот премиер врз неговиот македонски колега.
Ова денеска го изјави бугарскиот министер без ресор, Божидар Димитров во интервју за телевизијата „Бтв“.
Димитров изјави дека за ослободувањето на Митрова по пат на тивката дипломатија, бил вршен многу сериозен притисок од премиерот Бојко Борисов, кој неколку пати со категоричен тон побарал во разговор со македоскиот колега Никола Груевски, таа да биде ослободена.
Министерот Димитров, кој е познат по неговите контроверзни изјави за бугарско-македонските односи, наведе дека Спаска Митрова не е за жал ниту првиот, ниту последен случај на бугарски државјанин осудуван поради националното чувство.Случајот Спаска Митрова, за нас не е затворен додека таа не си го врати детето и не дојде на лекување во Бугарија, каде има подготвеност да бидат примени во воената болница во Софија.
Гевгеличанката Спаска Митрова, која има бугарско државјанство, во средата беше пуштена од затворот во Идризово, дваесет дена порано од тримесечната казна која ја издржуваше.
Таа беше осудена поради непочитување на судска одлука да му дозволи на поранешниот сопруг да ја посетува нивната ќерка.Случајот веднаш доби политичка димензија и предизвика дипломатски несогласувања помеѓу Бугарија и Mакедонија, а Софија тврди дека таа била осудена само затоа што е Бугарка. /крај/бг/мс/ег
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски за големиот протест во Србија: Ја следиме состојбата и не се мешаме во внатрешни работи на други земји

Нормално е да ја следиме состојбата во Србија. Неодговорно би било да не ја следиме состојбата со нашите соседи и врз основа на тоа сме подготвени за предизвиците. Доколку постојат такви имаме разработено сценарија, но не очекувам прелевање кај нас. Ова денеска го изјави премиерот Христијан Мицкоски, одговарајќи на новинарско прашање да даде коментар за случувањата во соседна Србија, каде денеска се одржува голем студентски протест, но и како ја оценува безбедноста состојба во нашата држава, односно дали случувањата во Србија можат да се рефлектираат и кај нас.
На прашањето дали е запознаен со информациите од тамошните медиуми дека структури од соседни земји на Србија, спомнувајќи ја и нашата држава, учествуваат во некакви сценарија за рушење на тамошната власт, премиерот рече дека политиката на власта е јасна, и додаде дека „не сакаме да ни се мешаат во нашите внатрешни работи, а ниту, пак, ние ќе се мешаме во внатрешните работи на која било друга земја“.
„Нашата домашна задача е наша домашна задача, а домашната задача на другите земји си е нивна домашна задача. Доколку некој побара помош од нас, советодавна, каква било, тука сме во рамкитена законите и Уставот на Македонија да овозможиме такво нешто. Доколку не, повторно ние ќе си ја гледаме нашата задача, затоа што имаме работи што треба дома да си ги решаваме. Немаме амбиција да бидеме дел од внатрешните работи на која било земја во светот“, рече Мицкоски.
Македонија
Герасимовски: Голема акција за чистење во ООУ „11 Октомври”, хигиената на прво место

Општина Центар информира дека денеска во основното училиште „11 Октомври“ се реализираше голема акција за чистење и уредување на училишниот двор, во која учествуваа ученици, наставници, родители, како и градоначалникот Горан Герасимовски.
Герасимовски, потенцираше дека оваа активност е дел од кампањата „Центар не чека, Центар чисти“, чија цел е подигнување на свеста за важноста на чистата животна средина.
„Денеска, преку заеднички труд, покажавме дека одговорноста за хигиената и уредноста на нашата околина ја носиме сите – и децата, и возрасните. Ова не е само акција за чистење, туку и едукативен момент за учениците, кои учат колку е важно да ја зачуваме природата. Среќен сум што сите активно се вклучија и ја поддржаа оваа иницијатива“, изјави Герасимовски.
Тој најави дека ваквите акции ќе продолжат и во наредниот период, со цел создавање почиста и поуредена средина за сите жители на Општина Центар.
Акцијата „Центар не чека, Центар чисти“ продолжува и во следните недели, а сите граѓани можат да пријават смет и диви депонии на телефонските броеви: 076/350-767 и 02/3203-693.
Македонија
Во паркот изграден како симбол на пријателството меѓу Општина Кисела Вода и Република Унгарија, одбележан Националниот ден на Унгарците

Во паркот во Драчево, кој минатата година беше изграден како симбол на пријателството меѓу Општина Кисела Вода и Република Унгарија, денес свечено беше одбележан Националниот ден на Унгарците. Настанот се одржа во присуство на градоначалникот Орце Ѓорѓиевски, амбасадорот на Република Унгарија во Македонија, Н.Е. Андраш Клеин, военото аташе на Унгарија, Надаш Ласло, претставници на Здружението на Унгарците во Македонија „Теледом“, како и бројни граѓани и гости. Беше положено свежо цвеќе пред бистата на Шандор Петефи, свои обраќања имаа градоначалникот Ѓорѓиевски и амбасадорот Унгарија Клеин, а настанот беше дополнет со интерсна културно-забавна програма.
– Денес, на денот кога го чествуваме Националниот ден на Унгарците, се наоѓаме во овој преубав парк во Драчево, кој го изградивме минатата година како симбол на пријателството меѓу Кисела Вода и Република Унгарија. Токму тука, поставивме и биста на големиот унгарски поет и борец за слобода, Шандор Петефи. Тој не е само симбол на унгарската историја, туку и на сите народи што се стремеле кон слобода, правда и национална гордост. Неговите стихови и неговото дело инспирирале многумина, оставајќи неизбришлив белег во колективната меморија на Унгарија, но и во срцата на сите оние што ги ценат вредностите на слободата и независноста. Неговото име и неговиот дух и денес не инспирираат да ја чуваме и нашата култура, традиција и идентитет.
Денес, со положувањето на свежо цвеќе пред неговата биста, не само што му оддаваме почит, туку испраќаме и силна порака дека пријателството меѓу Македонија и Унгарија, меѓу Кисела Вода и унгарската заедница, не само што опстојува, туку и се продлабочува. Ова пријателство е градено низ годините, преку културни размени, заеднички проекти и активности што го збогатуваат животот на нашите граѓани.
Затоа, дозволете ми да изразам искрена благодарност до Амбасадата на Унгарија, до здружението „Теледом“ и до сите кои со својата работа и посветеност придонесуваат за зајакнување на овие односи. Вашиот ангажман е непроценлив и уверени сме дека во иднина ќе продолжиме заедно да градиме нови иницијативи кои ќе ја продлабочат нашата соработка.
Од наша страна, сакам да истакнам дека Општина Кисела Вода ќе продолжи со поддршката на културните, образовните и историските проекти кои ја зајакнуваат врската меѓу нашите народи. Ова пријателство не е само симболично – тоа е жива врска што ја градиме со посветеност и искрена намера да ја пренесеме и на идните генерации.
Нека овој ден ни биде потсетник за тоа колку е важно да се почитуваме, да се поддржуваме и да градиме мостови на пријателство. Благодарам што сте денес тука, и што заедно продолжуваме да создаваме вредности што ќе живеат и за идните генерации-истакна градоначалникот Орце Ѓорѓиевски