Македонија
Два смртни случаи на заразени со грип, но причина била основната болест

Минатата недела пријавени се два смртни случаи кај кои бил идентификуван вирусот А(Х1Н1), но причината за смртта била поради други сериозни здравствени проблеми.
Минатата недела пријавени се два смртни случаи кај кои бил идентификуван вирусот А(Х1Н1), но причината за смртта била поради други сериозни здравствени проблеми.
„Се работи за женска особа кај која имало мозочно крварење и седумдесет и пет годишен маж со карцином на белите дробови“ изјави доктор Жаклина Шопова од Клиниката за инфективни болести.
Од инфективната клиника велат дека двајцата пациенти починале од основните болести, но кај нив бил изолиран и вирусот А(Х1Н1). „СЗО бара од секоја држава да ги пријавува сите случаи“ додаваат од таму.
Во последните 24 часа на инфективната клиника хоспитализирани се осум пациенти и моментално таму престојуваат 67 пациенти од кои четворица се на респиратор.На клиниката за детски болести има исто така нови осум примени пациенти, две деца се со потешка клиничка слика од кои едното е на респиратор. Вкупно таму се хоспитализирани 45 деца.
На детската клиника во Козле хоспитализирани се нови седум пациенти, а на инфективното одделение во Воената болница хоспитализиран е само еден нов примен пациент.
Во споредба со претходните недели има минимално намалување на бројот на пријавени, но лекарите велат дека тоа не значи дека епидемијата се смирува.
„Следејќи по недели наназад за претходната недела имаме минимално намалување на бројот на пријавени, ако претходните недели имавме по 9100,9200 пријавени сега имаме 8200 пријавени“ изјави доктор Јованка Костовска од Комисијата за пандемски грип.
„Тоа е минимално намалување што не значи дека епидемијата се смирува, дека грипот се смирува во Македонија, затоа што за такви проценки треба да се следи подолг период, да видиме барем и следните две недели што ќе се случува дали бројот ќе се зголемува или намалува“ додава Костовска.
Од почетокот на ноември до денеска пријавени се 36.100 лица од кои 15.000 се клинички докажани.
Несакани реакции од вакцината се пријавени четири случаи, но како што велат лекарите со очекувани реакции, напишани во упатствата.
„Согласно несаканите реакции за секоја вакцина што се употребува во Македонија при појава на некоја реакција после вакцинација, па макар да е тоа и некоја реакција која се појавила, по недела две три, а претходно бил вакциниран пациентот, должен е лекарот да пријави, а ние сме должни како држава понатаму да испитаме дали има некаква поврзаност со вакцината“ вели Костовска. /крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Во потрага по храна, мечка се качи на тераса од семејна куќа во Тетовско

Мечка се качила на тераса од семејна куќа во тетовското село Отуње.
Членовите на семејството биле во внатрешноста на куќата, па со мобилен телефон ја снимиле мечката качена на маса каде имало оставено храна, пишува „Тетово инфо“.
Според објавеното и во другите блиски села како Сетоле и Једоарце летово биле забележани слични примери на камери за видеонадзор.
„Мечките во потрага по храна, се движат низ селото, уништуваат сандаци со пчели и слично“.
Македонија
ОЈО со детали за големата акција: 13 лица под истрага за даночно затајување, перење пари и даночна измама, тргувале со горива

Денешната акција спроведена на повеќе локации низ државата е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, соопшти обвинителството.
Постапувајќи по кривичната пријава, надлежен обвинител од ОЈО ГОКК донел Наредба за спроведување на истражна постапка против 13 лица, меѓу кои се и четворица косовски државјани и една државјанка на Република Хрватска.
Осомничените се товарaт дека од 2014 до 2023 година организирале и учествувале во криминална група со цел стекнување противправна имотна корист преку даночно затајување, даночна измама и перење пари со што осомничените го оштетиле Буџетот на државата во големи размери. Групата креирала мрежа од правни субјекти преку кои се вршела продажба и фиктивна трговија со нафтени деривати, се изготвувале фактури со невистинита содржина, со цел да се избегне плаќањето на даночни обврски и да се оствари незаконски поврат на ДДВ. Преку правни лица што не поседуваат дозволи за трговија со нафтени деривати се вршела набавка, транспорт и продажба на Еуросупер, Еуродизел и Екстралесно гориво, со намера да избегнат целосно или делумно плаќање на законски предвидените даночни обврски. Продажбата во поголем број случаи се одвивала без издавање на фискални сметки и фактури, а средствата прибрани во готово не биле евидентирани во сметководствената документација. Осомничените странски државјани, кои формално биле назначени за одговорни лица во повеќе осомничени правни субјекти, немале регулиран престој во земјава, што организаторите на групата го користеле како начин за прикривање на нивната поврзаност со криминалното дејствување.
Воедно, организаторите на групата, од продадените нафтени деривати во готово пуштиле во оптек, примиле пари и извршиле пренос на паричните средства со намера да го прикријат нивното движење, со што се стекнале со противправна имотна корист во големи размери, а за која знаеле дека е прибавена со кривичното дело Даночно затајување, при што сториле и кривично дело Перење пари и други приноси од казниво дело.
Јавниот обвинител ценејќи дека се исполнети условите до судијата на претходна постапка при Основниот кривичен суд Скопје достави предлог за определување на мерка притвор за сите осомничени. До сега се обезбедени седум лица за кои е прифатен предлогот на обвинителството и судот со Решение им определи мерка притвор во траење од 30 дена, за останатите – петмината странски државјани и еден македонски државјанин мерката притвор ќе биде определена во отсуство.
Македонија
Муцунски-Јан Копман: разменети мислења за спроведувањето на реформската агенда, во фокусот и иницијативата „Роаминг како дома со ЕУ“

Министерот за надворешни работи и надворешна трговија, Тимчо Муцунски, денес и утре престојува во работна посета на Брисел, Кралството Белгија. Во рамки на посетата, денеска оствари средба со генералниот директор на Директоратот на Европската комисија за проширување и источно соседство, Герт Јан Копман.
На средбата беа разменети мислења за спроведувањето на реформската агенда, посветеноста на Владата да испорачува видливи резултати од реформските процеси, како и за Планот за раст како дел од пошироката европска поддршка за регионот. Муцунски нагласи дека Владата во изминатата година демонстрираше сериозна посветеност во исполнувањето на обврските од реформската агенда, постигнувајќи значителен напредок, особено во областите на дигитализацијата, владеењето на правото и борбата против корупцијата, при што истакна дека овие приоритети остануваат во фокусот на Владата и во наредниот период.
Се разговараше и за регионалната соработка, при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион.
Соговорниците се осврнаа и на актуелните геополитички и безбедносни предизвици во Европа. Во таа насока беше потенцирана важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година.
Муцунски уште еднаш ја потврди цврстата посветеност на Република Северна Македонија кон процесот на европска интеграција како еден од стратешките приоритети во надворешната политика. Тој ја истакна и целосната усогласеност на државата со Заедничката надворешна и безбедносна политика на ЕУ, како и значењето на стратешкото партнерство со Европската Унија во областа на безбедноста и одбраната.