Македонија
Доделени признанија за најдобра болница на годината

Министерството за здравство за прв пат додели признанија и благодарници за успешно работење на повеќе јавни здравствени установи.
Министерството за здравство во понеделник за прв пат додели признанија и благодарници за успешно работење на повеќе јавни здравствени установи.
Овие награди се доделени врз основа на вкупното работење на сите јавни и здравствени установи, финансиските извештаи, за наменско користење на средствата, долговите и обврските и висината на сопствените приходи.
Во време кога свинскиот грип, зема се поголем замав, за најдобра болница за професионално залагање и посветеност беше прогласена Инфективната клиника од Скопје, а награден беше и Институтот за јавно здравје.
За најдобра болница за финансиско и сметководствено работење е прогласена специјалната болница за ортопедија и трауматологија, „Свети Еразмо“ од Охрид.
Најдобра болница која ги исполнила годишниот план по вид и обем на здравствени услуги е Специјалната болница по гинекологија и акушерство во Чаир.
Најмногу пациенти примила Клиничката болница во Тетово, најквалитетно работела Универзитетската клиника за кардиологија од Скопје. Најдобри санитарно – хигиенски здравствени услуги има Универзитетската болница „Свети Наум Охридски“ од Скопје.
„Посебна чест и задоволство ми претставува наградата, но истовремено и голема одговорност. Се надевам дека ќе добиеме поголем буџет отколку лани, бидејќи од година на година ни се зголемува опсегот на работа и пациенти“ изјави Виктор Камиловски, Директор на Универзитетската болница „Свети Наум Охридски“ од Скопје.
Министерот за здравство Бујар Османи изрази големо задоволство за доделените награди и рече дека од идната година, при оценувањето ќе се земат во предвид и други критериуми. /крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Ако Коцевски сам не си поднесе оставка, ќе докаже дека е на функција само да ги спасува СДС

Ако главниот обвинител Коцевски сам не си поднесе оставка, ќе докаже дека е на функција само да ги спасува СДС од одговорност, изјави Бране Петрушевски, пратеник на ВМРО-ДПМНЕ.
„Главниот обвинител Коцевски доби два црвени картони, првиот од народот директно кој нема доверба во него ниту 2% и вториот од народот преку пратениците со интерпелацијата. Главниот обвинител Коцевски е свесен дека народот не му верува, и дека со ништо не покажал дека се труди тоа да го смени. Единствено нешто кое што Коцевски го прави, е да се држи до СДС, кои мораа да ја напуштат глумата на мачка и глушец, и да се соголат целосно, јавно бранејќи го во Собрание“, рече тој.
Петрушевски го праша обвинителот Коцевски нели се срами кога СДС мора да го бранат или тоа природно му доаѓа како контра услуга за сите функционери кои им ги спаси од кривична одговорност?
„Како може Коцевски да продолжи да биде главен обвинител, кога знае дека ниту еден случај за кој во изминативе години имаше низа докази излезени во јавноста не обезбеди пресуда? Дали за еден обвинител како Коцевски е поважно да биде потрчко на Заев и Филипче, отколку да работи за граѓаните? Доколку Коцевски има грам доблест, ќе си даде оставка веднаш, затоа што кредибилитет одамна нема“, рече Петрушевски.
Македонија
СДСМ: Бројот на вработени намален за 17.000 – погубни економски политики на ВМРО-ДПМНЕ

Фрапатни се податоците кои покажуваат дека по доаѓањето на ВМРО-ДПМНЕ на власт во 2024 година во земјава има над 17.000 помалку вработени, обвини СДСМ.
Според партијата, тоа е директен резултат на погубните економски политики, хаосот и несигурноста, како и напуштање на политиките кои ги востастави СДСМ за стабилна и одржлива економија.
„Со оваа неспособна Влада: пазарот на труд се стеснува, продуктивното население е разочарано и заминува, Фондот за пензиско осигурување е под притисок, бидејќи денес 1,63 вработени обезбедуваат една пензија, наместо 1,74 како што беше пред само една година. Владата нема стратегија, нема визија, нема мерки за задржување и отворање на нови работни места“, велат од СДСМ.
Од таму обвинија дека ова се последици од владеењето на Мицкоски и дека се зголемува несигурноста за младите, пензискиот систем се доведува во ризик, а приватниот сектор е оставен сам да се снаоѓа.
Македонија
Регионална иницијатива за превенција од пожари на Западен Балкан

Во услови на зголемени ризици од пожари, започна регионална иницијатива за подигање на свеста за управување со пожари на ниво на предел во земјите од Западен Балкан. Иницијативата, поддржана од Министерството за земјоделство, шумарство и водостопанство, има за цел да го поттикне интегрираното и одржливо управување со екосистемите, наместо традиционалниот пристап што се фокусира исклучиво на гаснење.
Пожарите оставија сериозни последици врз природата, економијата и животот на граѓаните, а над 90% од нив се предизвикани од човечка невнимателност — факт што укажува дека превенцијата е клучна.
Преку интерсекторска соработка, јакнење на локалните капацитети и активности на терен, иницијативата тежнее да создаде предели и заедници отпорни на пожари.
„Природата е наша заедничка одговорност. Со здружени напори можеме да постигнеме нула пожари предизвикани од човечки фактор,“ велат од Министерството.