Министерот за локална самоуправа, Златко Перински, и неговиот заменик, Ерџан Селими, денеска ја посетија Општина Шуто Оризари, каде што одржаа средба со градоначалникот Курто Дудуш и членовите на општинскиот Совет.

При посетата, која се реализираше во рамки на иницијативата „Каде што срцето е дома“, се разговараше за клучните прашања кои се однесуваат на локалниот развој, со посебен фокус на инфраструктурата и животната средина. Присутните едногласно констатираа дека атмосферската канализација е едно од најгорливите проблеми со кои се соочува општината, а во насока на надминување на овој проблем, Општината со владина поддршка веќе презема конкретни мерки.

Се имплементираат четири проекти за подобрување на атмосферската канализација, кои се дел од 24 одобрени на Шуто Оризари на првиот владин повик за поддршка на инфраструктурни општински проекти со вкупна вредност од над 1 милион евра.

Меѓу значајните теми на средбата беше и претстојната измена и дополнување на Законот за локална самоуправа, со кои ќе се овозможи унапредување на отчетноста на градоначалниците и зголемување на транспарентноста во работењето на општините.

Министерот Перински при посетата на Шуто Оризари истакна дека таа е пример за мултиетничка заедница на Македонци, Роми, Албанци и Турци, и токму таа разновидност е нејзината најголема сила. Притоа, ја истакна и важноста на продолжување на активната соработка помеѓу локалната и централната власт, за да се обезбеди одржлив развој и напредок на локалната самоуправа во сите сфери.

Министерството и Владата, порача министерот, ќе продолжат со континуирана поддршка на Шуто Оризари како еден од главните чекори кон зајакнување на локалната самоуправа и подигнување на стандардот на живот на сите граѓани во неа.

Продолжувајќи со засилените сообраќајни контроли по патиштата низ земјава во текот на изминатите два дена полициските службеници издале вкупно 1425 платни налози за сторени прекшоци по основ на одредбите од Законот за безбедност на сообраќајот на патиштата и Законот за возила, извести МВР.

Притоа, во рамки на оваа бројка, а по основ на преовладувачките прекршоци што ги прават учесниците во сообраќајот – неправилно паркирање и пречекорување на брзината на движење, беа регистрирани 415, односно 333 прекршоци. Покрај ова, без возачка дозвола регистирани биле 144 возачи, потоа 71 учесник во сообраќајот биле санкционирани за неносење сигурносен појас, 39 возачи на мотоцикл за неносење на заштитна кацига, а пак 64 за користење на мобилен телефон при возење.

Исто така, според статистичките податоци, во шест случаи возачи минале на црвено светло, во 18 случаи кај возачи било утврдено недозволено количество алкохол во крвта, а санкционирани биле и 15 пешаци.

По основ пак на Законот за возила 48 возила биле отстранети од сообраќај и тоа 14 заради техничка неисправност а 34 возила се отстранети од сообраќај затоа што биле нерегистрирани, соопшти МВР.

Од Министерството апелираат до граѓаните да ги почитуваат сообраќајните правила и прописи, особено за време на утрешниот празник возачите да не седнуваат зад воланот под дејство на алкохол.

„Одговорното однесување во сообраќајот е предуслов за да ја зголемиме безбедноста во сообраќајот и заедно да придонесеме за посигурни патишта“, велат од МВР.

Градоначалникот на Кисела Вода, Орце Ѓорѓиевски, денес беше во училиштето за рехабилитација на деца и младинци со оштетен вид „Димитар Влахов“, каде што започнаа градежните активности за уредување на нов парк. Просторот кој долги години беше запуштена депонија, наскоро ќе биде целосно преобразен во модерно катче за одмор, игра и рекреација, велат од Општината.

Овој проект е дел од пошироката заложба на локалната самоуправа за зелена и уредена општина, во рамки на која, во изминатите три и пол години, се уредени и изградени зелени површини и паркови на повеќе од 80.000 квадратни метри низ Кисела Вода. Новиот парк ќе биде збогатен со дрвја, урбана опрема, осветлување и детско игралиште, достапно како за учениците од училиштето, така и за жителите од околината, наведуваат од Општината.

„Денес, започнуваат градежните активности за уредување на дел од просторот на училиштето за рехабилитација на деца и младинци со оштетен вид „Димитар Влахов”. Се работи за изградба на нов, голем парк кој до вчера беше депонија и кој за кратко време од сега ќе биде преуреден во ново катче кое ќе понуди содржини за сите генерации.

Го уредуваме со парковско зеленило и дрвца, урбана опрема, осветлување и модерно детско катче каде најмлaдите жители од нашата општина ќе можат да уживаат во својата игра. Сето ова, хортикултурно ќе го уредиме за да изгледа уште поубаво. Сакам да се заблагодарам на општествено одговорната компанија за оваа вредна донација, која ги препозна нашите заложби за чиста и зелена општина. Овој пример, треба да го следат и другите.

Исто така, огромна благодарност до министерката за образование Весна Јаневска, која заедно со директорката на училиштето Александра Јаковчевска овозможија овој запуштен простор и депонија, да стане модерен парк кој покрај дечињата од училиштето, ќе можат да го користат и жителите од овој дел на општината.

За скоро време, граѓаните од овој дел на Кисела Вода добиваат катче каде ќе можат да се сретнат, да одморат, да се рекреираат или едноставно да уживаат на отворено. Промените се случуваат и продолжуваат секој ден, нема запирање“, истакна градоначалникот Ѓорѓиевски.