Претседателот на грчкиот Парламент Филипос Петсалникос во одговорот на писмото на неговиот македонски колега Трајко Вељаноски испратено до земјите членки на ЕУ, го изразува задоволството..

Претседателот на грчкиот Парламент Филипос Петсалникос во одговорот на писмото на неговиот македонски колега Трајко Вељаноски испратено до земјите членки на ЕУ, го изразува задоволството дека со писмото се потврдува посветеноста на Владата за скоро решение за името, но оти очекува дека зборовите наскоро ќе се претворат во дела.

Во одговорот на писмото, Петсалникос вели дека од ЕУ Самитот во Солун 2003, Грција јасно ја поддржува европската перспектива на сите земји од Западен Балкан, вклучувајќи ја и Поранешната Југословенска Република Македонија.

Неодамна, додава тој, дадовме нов поттик за европската интеграција на земјите од Западен Балкан преку Агендата 2014, новите насоки кои повторно ќе го заживеат процесот на проширување, ќе понудат и соодветни временски рамки во кои земјите од регионот ќе ги имплементираат неопходните реформи.

Понатаму, се истакнува во одговорот, Грција постојано ја поддржувала либерализацијата на визниот режим за граѓаните на Поранешната Југословенска Република Македонија, Србија и Црна Гора и оти новиот режим, кој веќе е имплементиран, ќе ги зближи граѓаните.

Претседателот на Собранието Трајко Вељаноски го упати писмото во ноември минатата година до земјите членки на Европската унија во кое бараше поддршка од неговите колеги за донесување одлука на Европскиот совет за одредување датум за почеток на пристапни преговори./крај/фо/мп