Министерот за образование и наука Никола Тодоров е запознат со писмото што високиот комесар за национални малцинства на ОБСЕ Кнут Волебек го испратил кај премиерот Никола Груевски, но не планира повлекување од својата одлука за изучување на македонскиот јазик.

Министерот за образование и наука Никола Тодоров е запознат со писмото што високиот комесар за национални малцинства на ОБСЕ Кнут Волебек го испратил кај премиерот Никола Груевски, но не планира повлекување од својата одлука за изучување на македонскиот јазик. „Не планирам да отстапам од одлуката, туку планирам да ги убедувам оние кои треба да ја применуваат, дека таа е од полза на сите нас кои живееме во Република Македонија и е во функција на целосна интеграција на македонското општество, согласно со современите демократски искуства и со демократските традиции“, рече Тодоров денеска во Скопје и нагласи дека нема намера да одлуката да ја спроведува со радикални мерки. Тодоров вели дека писмото на господинот Кнут Волебек има одлична ретроспектива на сите работи кои се случуваат во образованието и има конкретни, соодветни предлози за тоа како треба да се реализира процесот и што тие поддржуваат. Во писмото, кое вчера го објави А1 телевизија, Волебек инсистира пред да биде спроведена стратегијата на ОБСЕ да се промовира детален дијалог меѓу засегнатите страни, земајќи ги предвид потребите на секоја заедница и да се осигура соодветен образовен материјал како и програми за обука на наставниот кадар. „Јасно е наведено дека македонскиот јазик како државен јазик треба да се изучува на задолжителна основа во основното образование, и тоа почнувајќи од прво одделение, што во себе има и педагошки и културни и научно докажани факти“, рече Тодоров. /крај/ач